Сингапурдаги боғчалардан бирида 10 йиллик тажрибага эга бўлган тарбиячи алоҳида эҳтиёжли тарбияланувчига нисбатан куч ишлатгани учун 18 ойлик қамоқ жазосига ҳукм қилинди. У энди ҳеч қачон педагогик фаолият билан шуғуллана олмайди.

Воқеа махсус дастур асосида фаолият юритадиган боғчада содир бўлган. Жабрланувчи аутизм, диққат етишмаслиги ва ўта ҳаракатчанлик (СДВГ) ҳамда нутқ ривожланишидан орқада қолиш ташхислари қўйилган 6 ёшли болакай бўлган.

Навбатдаги машғулотлардан бирида боланинг хулқ-атворидан ғазабланган тарбиячи ўзини тута олмай, қўлидаги ручка билан унинг бош қисмига бир неча бор турткилаган. Сўнгра айбини яшириш мақсадида ота-онага бола ўз ўйинчоғи орқали жароҳатланганини айтган. Аммо фарзандининг аҳволидан шубҳаланган ота-она боғча маъмуриятидан кузатув камералари ёзувларини талаб қилган ва асл ҳақиқат юзага чиққан.

Суд жараёнида айбланувчининг адвокати аёлнинг охирги вақтларда отасининг оғир касаллиги сабабли кучли стрессда бўлганини, шу пайтгача қонунбузарлик содир этмагани ва соҳада фақат ижобий тавсифланганини айтиб, енгиллик сўради.

Бироқ суд ҳимоя томонининг бу важларини асоссиз деб топди. Ўзини ҳимоя қила олмайдиган болага нисбатан шафқатсизлик қилган собиқ педагог 1 йилу 6 ой муддатга озодликдан маҳрум этилди.