Президент Доналд Трамп АҚШ ва Япония «тарихдаги энг йирик» савдо битимига келишганини эълон қилди.

Бунинг асосида Япония маҳсулотларига 15 фоизлик бож жорий этилади. Аввалроқ Трамп, битимга эришилмаса, Японияга 1 августдан 25 фоизлик бож солинади, дея таҳдид қилганди.

«Биз ҳозиргина Япония билан улкан келишувга эришдик, эҳтимол, бу тарихдаги энг йирик битим бўлиши мумкин», — деб ёзди Трамп ўзининг Truth Social ижтимоий тармоғида.

Трампнинг айтишича, шу келишув асосида Япония «унинг кўрсатмаси билан» АҚШга 550 млрд доллар инвестиция киритади. АҚШ фойданинг 90 фоизини олишини таъкидлаган Трамп тафсилотларни очиқламаган.

Япония бош вазири Шигэру Ишиба бунга жавобан Трамп эълон қилган келишувни изоҳлашдан олдин унинг тафсилотларини ўрганиб чиқишим керак, деди.

«Музокаралар натижаларига тўхталадиган бўлсак, токи биз музокаралар ва келишув тафсилотларини батафсил ўрганиб чиқмагунимизча, мен бу борада бир нарса дея олмайман», — деди у Токиода журналистларнинг саволларига жавобан.