АҚШ президенти Доналд Трамп БМТ Бош ассамблеясида жорий йил 23 сентябрь куни сўзлаган маърузасида ёлғон ва чалғитувчи факт ҳамда фикрларни илгари сурди. Трампнинг баёнотини таҳлил қилган “Euronews” телеканали ана шундай хулоса келган.

Трамп нутқи мобайнида Европа етакчиларини миграция сиёсати учун танқид қилар экан, “муқаррар ҳалокат”дан баҳс этган.

“Чегараларни очиш билан боғлиқ муваффақиятсиз экспериментга чек қўйиш вақти келди. Буни ҳозироқ тўхтатишингиз керак. Сизларнинг мамлакатларингиз дўзах томон кетмоқда”, – дея ваҳима кўтарган Трамп Европа етакчиларига хитоб қиларкан.

Европа статистика идораси таҳлилларига қараганда, 2024 йилда Европа Иттифоқи аҳолисининг 9,9 фоизини хорижда туғилган муҳожирлар ташкил этган.

Муқояса учун: 2025 йилнинг январида АҚШ аҳолисининг 15,8 фоизи хорижликлар ёки муҳожирлардан иборат бўлган. Демак, муҳожирлар борасидаги вазият ЕИга қараганда АҚШнинг ўзида қалтисроқ.

Таҳлилчилар статистикадан қатъи назар, миграция феноменини бутунлай қора бўёқда тасвирлаш оқилона иш эмас деб ҳисоблайди.

Трамп нутқи мобайнида Буюк Британия пойтахти Лондон шаҳри ҳокими Содиқ Хонни кескин танқид қилар экан, у Лондонда “шариат қонунлари ҳукмронлигини ўрнатиш”га уринаётганини айтган.

Содиқ Хон Лондонда ислом динини мажбуран ёйиш учун ҳаракат қилаётгани ҳақидаги ёлғон маълумот ижтимоий тармоқларда кўпдан буён тарқатилиб келади. Трамп ҳам ушбу баҳсли фикрни ҳақиқат ўлароқ тақдим этишга уринган.

Ушбу иддаони рад этган Лондон ҳокими Содиқ Хон АҚШ президентини ирқчи ва исломофоб деб атаган.

Трамп Россиянинг Украинага босқини ҳақида гапирар экан, ҳар ҳафта ҳар икки томондан 5000-7000 аскар ҳалок бўлаётганини таъкидлаган.

Экспертлар фикрича, бу рақам ҳам ҳақиқатга тўғри келмайди. Аслида, Россия ва Украина армияси ҳар ҳафта ўртача 1850 аскардан айрилмоқда.

АҚШ раҳбари БМТ минбаридаги чиқишида Европа давлатлари глобал исишга қарши олиб бораётган курашни қоралаб, иқлим ўзгариши ҳақидаги фикрларни “дунёдаги энг катта фирибгарлик” дея иддао қилган.

“Европада ҳар йили иссиқ урушидан 175 мингдан зиёд киши вафот этмоқда. Чунки одамлар харажатлар қимматлигидан кондиционер ҳам ёқа олмайди. Буни нима деб изоҳлаш мумкин? Бу мен билган ва мен севган Европа эмас. Буларнинг бари глобал исиш деб аталган афсонани гўё тўхтатишга қаратилган ҳаракатлардир”, – дея минглаб нуфузли экспертлар очиқ-ошкора тасдиқлаган глобал исиш ҳодисасини рад этишга уринган у.

“Nature Medicine” тиббий журналида чоп этилган тадқиқотда қайд этилишича, 2024 йилда Европада бевосита жазирама сабабли 62700 киши вафот этган.

Европанинг атроф-муҳит бўйича агентлиги кўҳна қитъа дунёнинг бошқа минтақаларига қараганда тезроқ исиб бораётгани ҳақида бонг урмоқда.

Аввал хабар берганимиздек, Трамп БМТдаги нутқи мобайнида дунёдаги узоқ давом этган еттита урушни тугатганини ҳам даъво қилганди.

АҚШ раҳбари маъруза ва баёнотларида алдов аралаштириши янгилик эмас. Ҳатто биринчи президентлик даврида ҳам у ёлғон-яшиқдан у қадар тортинмаган. Масалан, CNN телеканали 2019 йилда Трамп бир ҳафта давомида 21 маротаба ёлғон гапирганини ҳисоблаб чиққанди.

Сиёсатчи ўтган йил июнь ойида Жо Байден билан сайловолди теледебатда ҳам 30 та ёлғон баёнот бергани маълум.

Дарвоқе, 79 ёшли Трамп сўнгги вақтларда давлатлар номлари, жуғрофий атамалар борасида қатор хатоларга ҳам йўл қўймоқда. Бу каби хатолар ортидан ижтимоий тармоқларда унинг ақлий салоҳияти борасида саволлар янграётгани айтилмоқда.