АҚШ президенти Доналд Трамп АҚШнинг Сурияга қарши 2004 йилдан бери амалда бўлган иқтисодий санкцияларини бекор қилиш ҳақидаги фармонни имзолади. Оқ уй бу қарорни «барқарорлик ва тинчлик сари қадам» эканлигини айтди.

«Қўшма Штатлар барқарор, бирлашган, ўзи ва қўшнилари билан тинчликда бўлган Сурияни қўллаб-қувватлаш тарафдори. Террорчи ташкилотлар учун хавфсиз бошпана бўлмаган, диний ва этник озчиликлар хавфсизлигини таъминловчи бирлашган Сурия минтақавий хавфсизлик ва фаровонликни қўллаб-қувватлайди», - дейилади қарор матнида.

Маълум бўлишича, Россияга қочган Суриянинг собиқ президенти Башар Асад, унинг оила аъзолари ва ағдарилган режим тарафдорларига қарши санкциялар ўз кучида қолмоқда.

Америка етакчиси май ойи ўрталарида Ар-Риёдда Суриянинг янги раҳбари Аҳмад ал-Шара билан учрашишдан олдин Дамашққа нисбатан санкцияларни бекор қилиш ниятида эканлигини маълум қилган эди. 

Оқ уй Суриянинг янги расмийлари ҳаракатларини, жумладан, «Исроил билан муносабатларни нормаллаштириш бўйича аниқ чоралар кўришини» кузатиб боришини айтди.