ТАСС хабарига кўра, Хитой коронавирусга қарши 11 та вакцинани клиник синовдан ўтказяпти. Бу ҳақда ХХР фан ва техника вазири Ван Чжиган Пекинда фан, саломатлик ва турмуш масалаларига бағишлаб ўтказилган глобал форумда маълум қилди.

Вазирнинг айтишича, вакциналарнинг тўрттаси 3-босқич синовларигача етиб келган.

«Куз ва қишда коронавирус пандемияси янада кучайиши мумкин, касаллик профилактикаси ва назорати бўйича ҳолат эса ҳамон долзарблигича қолмоқда», — таъкидлади Ван Чжиган.

Вазир коронавирусга қарши курашишда Хитой халқаро ҳамкорликни доим биринчи ўринга қўйгани, очиқлик ва шаффофлик тамойилларига риоя қилиб келганини қўшимча қилди.

Эслатиб ўтамиз, Хитойда август ойида коронавирусга қарши илк вакцина патентланган эди: Хитой халқ-озодлик армияси ҳарбий-тиббиёт фанлари академияси ва «Can Sino Biologics» компанияси ҳамкорликда Ad5-nCoV аденовирус вектори асосида рекомбинант вакцина ишлаб чиққанди.

Бундан ташқари, мамлакатда ҳашаротлардан олинган коронавирусга қарши вакцинани ҳам одамларда синашга рухсат берилганди.

Хитойнинг «Sinopharm» фармацевтика компанияси эса ўз вакцинасини 2020 йилнинг декабрь ойидан етказиб беришни бошлашини маълум қилган ва бу вакциналарга 150 доллар нарх белгилаганди.