Буюк Британияга қочиб кетган КГБ агенти Олег Гордиевский 87 ёшида вафот этди. Бу ҳақда BBC хабар берди.

XX асрнинг энг машҳур жосусларидан бири сифатида тилга олинувчи Гордиевский британ разведкасининг совет махсус хизматларига кириб олган Олег Пеньковскийдан кейинги энг катта агенти саналади.

Олег Гордиевский КГБда 23 йил ишлаган ва ҳатто 1985 йилда Британиядаги совет резидентурасини бошқаришига оз қолган. Бироқ британ контрразведкаси билан алоқадорликда гумон қилиниб, Москвада бир неча соат сўроқ қилинганидан сўнг, ўша йил июлида Иттифоқдан қочиб кетган. Қочиб кетганлиги ва МИ-6 (Буюк Британия ТИВ махфий разведка хизмати) билан алоқаси учун Гордиевский ўлимга ҳукм қилинган.

Гордиевскийнинг қочишини Буюк Британиянинг Москвадаги элчихонаси ташкиллаштирган — у дипломатларга қарашли машина юкхонасида олиб кетилган.

Капиталистик лагерга қочиб ўтган Гордиевский Хрушчёвнинг «илиш даври»дан сўнг Сталин жиноятларини англаб етиб дунёқараши ўзгарганини маълум қилган.

Олег Гордиевскийга 2007 йил июнида Британиянинг авлиё Михаил ва авлиё Георгий кавалерлиги тақдим этилган.