Украина Президенти Владимир Зеленский АҚШ президенти Дональд Трампнинг Қримдан воз кечиш орқали можарони тўхтатиш мумкинлиги ҳақидаги баёнотига ижтимоий тармоқда муносабат билдирди.

«Қримни ўша пайтда ҳам қолдирмаслик керак эди», – деб ёзди Зеленский.

У, шунингдек, жангларнинг тезроқ тугашидан манфаатдор эканини таъкидлаб, узоқ муддатли тинчлик зарурлигини қайд этди.

Трамп эса аввалроқ Зеленский Қримдан воз кечиб, НАТОга кириш режасидан ҳам чекинадиган бўлса, деярли дарҳол можарони тўхтатиши мумкинлигини билдирган эди.

Душанба куни Вашингтонда Трамп ва Зеленскийнинг феврал ойидаги тортишувдан сўнгги илк юзма-юз учрашуви бўлиб ўтади. АҚШ давлат котиби Марко Рубионинг айтишича, музокараларда Украина хавфсизлигига кафолат бериш масаласи муҳокама қилинади. Президентнинг махсус вакили Стив Уиткофф эса Вашингтон ҳудудий масалаларда келишувга эришишга умид қилаётганини билдирди.

Музокараларда шунингдек Германия канцлери Фридрих Мерц, Британия Бош вазири Кир Стармер, Франция президенти Эммануэль Макрон, Италия Бош вазири Джорджа Мелони, Финляндия президенти Александр Стубб, Еврокомиссия раҳбари Урсула фон дер Ляйен ва НАТО бош котиби Марк Рютте ҳам иштирок этади.

Трамп ва Зеленскийнинг икки томонлама учрашуви Тошкент вақти билан соат 22:15 да бошланиши, кўп томонлама форматдаги музокара эса соат 00:00 да старт олиши белгиланган.

Зеленский аввалроқ Telegram-канали орқали Вашингтонга ташрифдан мамнунлигини билдириб, можарони якунлаш истагини яна бир бор таъкидлаган эди.