Бухорода келинини умрига зомин бўлган қайнотага ҳукм ўқилди.

2024 йил охирида содир бўлган қотиллик ҳолати юзасидан кўриб чиқилган суд ишига оид ҳукм жорий йилнинг июн ойида ўқиб эшиттирилди.

 68 ёшли, асли Тошкент вилоятида туғилган ва узоқ йиллардан буён Бухоро вилоятининг Когон шаҳрида яшаб келган рус миллатига мансуб Виктор Кузеев айрим қўни-қўшнилар билан ҳам азалдан келишмовчилиги бўлган. Спиртли ичимликлар истеъмол қилиб юрадиган Виктор Кузеев ўз оиласи билан ҳам тез-тез жанжал ва келишмовчиликларга бориб турган.

Шундай кунларнинг бирида у ўғли Дима Кузеев билан бирга яшаб келаётган келини Дилнура Исломова билан ҳам ўзаро тортишувга борган. Оғзаки тортишувдан сўнг келини подъезд ва йўлакларни тозалаш учун кўчага чиқиб кетган. Қайтиб келган келин эшикнинг ичкаридан қулфлаб қўйилганини кўриб, қайнотасидан уни очишини сўраган.

Бироқ, қайнота қўполлик билан: «Қаердан келган бўлсанг, ўша ерга кет!»-дея бақирган. Келин бир муддат кўчадаги ўриндиқда қолиб кетган. Орадан вақт ўтиб, қайнота эшикни очиб, келинидан ичкарига киришини айтган. Қайнота яна ичкарига кирган келин билан жанжаллаша бошлаган. Жаҳли чиққан келин қайнотасини итариб юбориб, уни ўқлов билан ура бошлаган. Спиртли ичимлик таъсирида бўлган қайнота ўзини ҳимоя қилиш учун ошхона пичоғини олиб, келинига ташланган. Пичоқ билан келинининг қорин ва қорин усти қисмига шафқатсизларча урган. Дилнура йиқилган ва судралган кўйи кўчага чиқиб, қўни-қўшнилардан ёрдам сўраган.

Жабрланувчи Дилнура Исломовага тезкор тиббий ёрдам кўрсатилиши ва муолажалар олиб борилишига қарамай, у касалхонада вафот этган.

Қайнота суд-тергов жараёнларида қилмишидан пушаймонлигини, соғлиғининг ёмонлигини, нафақахўр эканлигини инобатга олиб, унга нисбатан адолатли қарор чиқаришни сўраб кўрсатув берган.

Бухоро вилояти суди ахборот хизмати раҳбари Феруз Шароповнинг «Xabar.uz»га билдиришича, айбдорга нисбатан Ўзбекистон Республикаси Жиноят кодексининг 97-моддаси (Қасддан одам ўлдириш) билан иш қўзғатилган. У жиноят ишлари бўйича Когон шаҳар суди ҳукми билан 7 йил муддатга озодликдан маҳрум этилган.