Пойтахтнинг Юнусобод тумани 5, 6, 7 даҳаларида техноген сув босиш ҳодисалари кузатилди.

«Тошкент шаҳар сув таъминоти» АЖ бунга электр тизимидаги узилишлар сабаб бўлганини маълум қилди.

Бунга жавобан Энергетика вазирлиги расмий муносабат билдириб, Юнусобод туманидаги 4-сонли қозонхонада 2-3 июль кунлари электр таъминотида ҳеч қандай узилиш юз бермаганини қайд этди.

Бугун, 2024 йил 3 июль санасида Юнусобод туманининг 6- ва 7-мавзеларида сув тошишига оид хабарлар ижтимоий тармоқларда тарқалди. Ушбу ҳодиса юзасидан Тошкент шаҳар «Сув таъминоти» АЖ матбуот хизмати томонидан воқеага ҳудуд яқинида жойлашган «Тошкент иссиқлик маркази» МЧЖга қарашли 4-сонли қозонхонада электр таъминоти узилиши сабаб бўлганлиги келтирилган.

«Иссиқлик электр станциялари» АЖ таркибидаги «Тошкент иссиқлик маркази» МЧЖ Тошкент шаҳар «Сув таъминоти» АЖнинг мазкур баёноти ҳақиқатга мос эмаслигини билдиради ва 4-сонли қозонхонада 2-3 июль кунлари электр таъминоти билан боғлиқ ҳеч қандай узилиш юз бермаганини маълум қилади. Сув тошқинига қозонхона фаолиятининг ҳеч қандай алоқаси йўқ.

4-сонли қозонхона 2024 йилнинг 2 июлидан 3 июлига ўтар кечаси барқарор ва штат режимида фаолият юритган.

Айни пайтда қозонхонага сув таъминотининг етарли даражада етказиб берилмаётганлиги сабабли мавжуд имкониятлардан келиб чиқиб ишлаб чиқариш ҳажми пасайтирилган, дейилади вазирлик баёнотида.