Қораўзак туман давлат солиқ инспекцияси мансабдори маъмурий жавобгарликка тортилди. Бу ҳақда «Xabar.uz»га Бизнес-омбудсман матбуот хизмати маълум қилди.

Бизга берилган маълумотга кўра, бугунги пандемия шароитида тадбиркорларга бир қатор қулайликлар яратилганига қарамай, ДСИ мансабдори бунга тескари хатти-ҳаракатлар содир этган.

Хусусан, Ўзбекистон Республикаси Президентининг 2020 йил 19 мартдаги фармони (ПФ-5969-сон)га мувофиқ тадбиркорларга бир қатор имтиёз ва преференциялар берилди, жумладан, 2020 йил 1 октябргача бўлган даврда солиқ органлари вақтинча қийинчиликларни бошдан кечираётган хўжалик юритувчи субъектларга мол-мулк солиғи, ер солиғи ва сув ресурсларидан фойдаланганлик учун солиқ бўйича пенялар ҳисобланишини тўхтатиб туради, шунингдек, солиқ қарзини мажбурий ундириш чоралари кўрилмаслиги белгиланган.

Бироқ, Қораўзак туман давлат солиқ инспекцияси вақтинча қийинчиликларни бошдан кечираётган «TITAN CEMENT» МЧЖнинг мол-мулк солиғи ва ер солиғидан жами 1 153 514 745,39 сўмлик қарздорликни ундириш бўйича жамиятнинг банк ҳисоб-рақамига инкассо топшириқномалари қўйиб, мажбурий ундириш учун чоралари кўрилган.

Бизнес-омбудсман девони аралашуви билан тадбиркорнинг ҳисоб-рақамига қўйилган инкассо топшириқномалари олиниши таъминланди ҳамда ушбу қонунбузилишга йўл қўйган Қораўзак туман ДСИ ходимига нисбатан маъмурий баённома расмийлаштирилди.

Натижада туман маъмурий суднинг қарори билан Қораўзак туман ДСИнинг мансабдори маъмурий жарима жазосига тортилди.