Ўзбекистон молия вазирининг 2017 йил 26 декабрдаги 182-буйруғи билан бюджет ташкилотлари ва бюджет маблағлари олувчиларнинг даврий молиявий ҳисоботларини тузиш, тасдиқлаш ҳамда тақдим қилиш қоидалари тасдиқланди. Бу ҳақда «Xabar.uz»га вазирликнинг масъул ходими хабар берди.

Ушбу қоидалар Бюджет кодекси ва «Бухгалтерия ҳисоби тўғрисида»ги қонун асосида ишлаб чиқилган бўлиб, барча бюджет ташкилотлари ва бюджет маблағлари олувчилар томонидан даврий молиявий ҳисоботларни тузиш, тасдиқлаш ҳамда тақдим этиш тартибини белгилайди.

Мазкур қоидаларга қуйидаги янгиликлар киритилди:

— харажатлар сметаси ижроси ҳақида ойлик ҳисоботни тақдим этиш бекор қилиниши;

— бюджет ташкилотлари барча молиявий ҳисоботларни «UzASBO» дастурий мажмуаси орқали электрон рақамли имзодан фойдаланган ҳолда электрон шаклда тақдим этиши;

— марказлаштирилган молия-бухгалтерия хизматлари молиявий ҳисоботларни қуйи муассасалар кесимида тузиши ҳамда жамланган ҳолда тақдим этиши;

— бюджет ташкилотларининг ҳисобот давридаги чет эл валюталари ҳаракати тўғрисидаги маълумотларини акс эттириш мақсадида «Бюджет ташкилотининг чет эл валюталари бўйича пул маблағлари ҳаракати тўғрисида»ги ҳисоботи шакли.

Бундан ташқари, бюджет ташкилотлари ва бюджет маблағлари олувчилар томонидан молиявий ҳисоботларни тақдим этиш муддатлари қуйидагича белгиланди:

Мазкур буйруқ кучга кирганлиги муносабати билан Ўзбекистон молия вазирининг 2017 йил 26 декабрдаги 181-буйруғига асосан «Ўзбекистон Республикаси давлат бюджетидан маблағ билан таъминланадиган ташкилотларнинг даврий молиявий ҳисоботларини тузиш, тасдиқлаш ҳамда тақдим қилиш қоидаларини тасдиқлаш ҳақида»ги буйруқ ўз кучини йўқотган деб топилган.