Бу туман даражасида амалга оширилган республикадаги илк мураккаб амалиёт бўлди. “Ўзбекистон 24”телеканали журналисти Назира Мамбетшарипова воқеа жойидан репортаж тайёрлади.

Давлатимиз раҳбари ўз фаолиятининг дастлабки кунлариданоқ тинчлик ва саломатлик мамлакатнинг энг катта бойлиги эканлигини таъкидлаб келади. Шу боис, тиббиёт соҳаси президентимизнинг жиддий назорати ва эътиборида.

Ҳар бир вилоятга ташрифи чоғида, албатта, тиббий объектларни кўздан кечиради. Видеоселектор йиғилишлари ўтказиб, соҳанинг трансформациясини бош масала сифатида кун тартибига қўйиб келади. Бугун президент қўяётган вазифа ҳам шу: тиббиёт соҳасини чинакамига халқ дардига дармон бўладиган юқори самара билан ишлайдиган тизимга айлантириш.

Бекобод туман марказий шифохонаси. Бу йўлаклар кўп дардни кўрган. Шифохона йўлакларида бугун бошқача ҳаяжон. Ана, яқинлари даврасида ўтирган, дуо қилувчи онахон — Инобат Алиева.

— Хола, яхшимисиз?

— Аллоҳга шукур, яхшиман!

Юрагидаги оғриққа, кўнглидаги умидга тилакдош бўлиб, у мураккаб операция остонасида турибди. Энди роҳатга кирдим деганда, хасталикка чалинди. Тошкент олис, узоқ йўл оғирлик қилади. Бугун Бекободдаги туман шифохонасида ўта мураккаб юрак операциясининг йўлга қўйилиши унинг шифо умидига айланди.

— Нима безовта қиларди?

— Юрак санчиқ... Ҳозир яхшиман. Худо хоҳласа яхши бўлиб кетаман. Соғ-саломат, ўйнаб-кулиб, 100 ёшларга киришни ўйлаяпман.

Биз журналистлар учун ҳам бу суҳбат ҳаяжонли, чунки яқингача туман даражасида аорта-коронар шунтлаш каби юрак операциясини тасаввур қилишнинг ўзи мушкул эди. Бу операция кардиохирургияда “олтин стандарт” дея эътироф этилган. Юракка қон айланишини тикловчи бу мураккаб амалиёт бугун айнан Бекободда амалга оширилмоқда.

Бу Ўзбекистон тиббиётидаги навбатдаги ютуқ, президентимиз қўйган вазифалардан бири — юқори технологик тиббий хизматларни марказдан жойларгача етказиш мақсади эди. Энди бу ташаббус ҳаётга татбиқ этилди.

Туманнинг марказий шифохонасидаги операция залида илк бора тарихий воқеа — очиқ юракда аорта-коронар шунтлаш операцияси бажарилмоқда. Унда Республика ихтисослаштирилган кардиология илмий-амалий тиббиёт маркази мутахассислари билан биргаликда Бекобод туманининг операция бригадаси ҳамкорликда иштирок этишяпти. 60 ёшдан ошган онахоннинг операцияси. Демакки, юрак очилдими, умидлар очиляпти. Энг юқори технологиялар мана шундай ҳудудларга кириб боряпти.

Тошкентдан келган доктор Алишер Мелиқулов бошлигидаги Республика ихтисослаштирилган кардиология илмий-амалий тиббиёт маркази кардиохирурглари учун бу жуда масъулиятли лаҳза.

— Бу албатта, тарихий воқеа. Бу "инсон қадри" ғоясининг амалий исботи ҳисобланади. Сабаби, 8-9 йил илгари бу операциялар пойтахтимиздаги саноқли илмий-амалий марказларда амалга ошириларди ва бу эса беморларнинг бир неча ойлаб навбатда туришга тўғри келарди. Беморларнинг кўпчилиги шифо излаб чет элларга кетишга мажбур бўларди. Бу операцияларнинг энди вилоятда, туман даражасида амалга ошириш йўлга қўйилиши, бу тиббиётни халқимизга янада яқинлашиши десак, муболаға бўлмайди, — дейди Алишер Мелиқулов. — Албатта, ушбу яратиб берилаётган шарт-шароитлар, имкониятлар учун давлатимиз раҳбаридан беқиёс миннатдормиз.

— Алишер Мардонович коронар шунтлаш амалиётини ишлаб турган юракда бажаряптилар. Амалиёт ишлаётган юракда бажарилганда беморнинг тузалиши осон кечади, —дейди перфузиолог Ҳусниддин Тошпўлатов.

— Оксигенераторлардан муаммо йўқми? Бир пайтлар оксигенераторлар йўқлигидан операциялар бажарилмай қоларди?

— Ҳа, бундан 5-6 йил олдин оксигенератор топилмасди. Аппаратлар бўлмаган, перфузиолог мутахассис бўлмаган. Ҳозир оксигенераторларимиз бор, аппаратлар бор, перфузиолог мутахассисларимиз бор.

Албатта, 43 йиллик тарихга эга туман тиббий шифохонасидаги бундай юқори малакали амалиёт тиббиёт тарихидаги яна бир бурилиш бўлди. Бу биргина оила эмас, балки инсонлар ҳаёти, бутун халқ ишончини тиклаётган муҳим амал.

— 74-йилдан бери анестезиолог бўлиб ишлаяпман, — дейди туман марказий шифохонаси реанимация бўлими раҳбари Мирзақул Раҳматов.

— Бугун туманда тиббиёт қанчалик ўзгарди деб ўйлайсиз?

— Имкониятларимиз жуда ошди, чунки бўлимимизда компьютер томографияси очилди, коронарография очилди. Янги аппаратлар кўп келди. Ташхис қўйишни ўзи жуда қийин эди, компьютеримиз йўқ эди. Ҳозирги пайтда қарангки, Тошкент вилоятининг айнан Бекобод туманида коронарография очилган, юрак томирларини кўриб, стент қўйиб, инфарктларга самарали ёрдам беряпмиз. Бўка туманидан, Бекобод шаҳридан, Пискент туманидан инфарктга учраган беморлар келяпти, коронар қилиб тузатиб, жўнатиб юборяпмиз. Бу жуда катта муваффақият. Тиббиётимизга президент томонидан катта эътибор бўлди. Касалхонада болалар поликлиникаси йўқ эди, ҳозир мана поликлиника қуриляпти. Ҳозир яна туғруқ комплекси ҳам қуриляпти. Бу дегани, бизда қарийб ўша Тошкент шаҳридаги шароит билан тенг бўлиб қолади. Туман даражасида бу жуда катта муваффақият.

Бекобод тумани аҳолиси агар мабодо марказий клиникаларга иши тушадиган бўлса, шу пайтгача Чирчиққа боришига тўғри келади, бу айниқса болалар масаласида қийинчиликларни юзага келтирарди. Мана энди шу ернинг ўзида тез орада болалар поликлиникаси қад кўтаради.

Шифокорлар бугун яна бир муҳим янгилик билан улашишди — Бекобод туманида янги она ва бола туғруқ комплексини лойиҳалаштириш ишлари бошлаб юборилибди...

Операция муваффақиятли ўтди. Қаҳрамонимиз Инобат онанинг юрагидаги ишонч ғалаба қозонди.

— Раҳмат, мана шунчалик операция қилишди, энди яхшиман. Энди яна ҳаётга қайтдим, — дейди Инобат Алиева.

Мамлакатнинг энг чекка ҳудудларидан бири — Бекободдан бошланган бундай тарихий жараён — очиқ юракда бажарилган операция, бу мамлакат тиббиётининг саломатлик маромига ҳамоҳанг.