2023 йилнинг жорий даврига қадар Бухоро вилоят ИИБ тизимида фаолият юритиб келган 152 нафар ходимнинг хизмат интизомини бузгани аниқланиб, 76 нафари устидан мурожаат келиб тушган.

Бу ҳақда вилоят ИИБ бошлиғи, полковник Миржамол Миралимов иштирокидаги матбуот анжуманида маълум қилинди, дея хабар қилди «Xabar.uz» мухбири.

Таъкидланишича, 2023 йилнинг мос даврига қадар Бухорода жами 950 та жиноятлар қайд этилган. Бу кўрсаткич 100 минг аҳоли сонига нисбатан ўртача 47,3 тадан тўғри келиб, ўтган йилнинг 3 ойига нисбатан 0,8 тага кўпайган.

Таъкидланишича, безорилик ҳолатлари 27 тага, тан жароҳати етказиш жиноятлари 25 тага, номусга тегиш 6 тага, талончилик 3 тага, ўғирлик 37 тага, ҳокимият вакилига қаршилик кўрсатиш 2 тага, қотиллик жинояти 2 тага етган.

«Пробация бўлимлари фаолиятига назар ташланадиган бўлса, жами 3889 нафар назоартдаги шахслар бўлиб, 1400 нафар киши ахлоқ тузатиш ишларига жалб қилинган. Шахсий ҳукм қилинганлар сони 36 нафардан, муайян ҳуқуқдан маҳрум қилинганлар 346 нафардан, озодликни чеклаш жазосини олганлар 928 нафардан иборат. Шунингдек, мажбурий жамоат ишларига 7 нафар шахс бириктирилган. Муддатидан илгари шартли озод қилинганлар 1655 нафарни, шундан ёшлар сони 56 нафарни, вояга етмаганлар сони 54 нафарни ташкил этмоқда. Пробация ҳолатини содир қилган шахслар томонидан жами 16 та жиноят содир этилишига йўл қўйилган»,—деди бошқарма бошлиғи.

Маълум бўлишича, вилоят ички ишлар идораларига жами 3 876  нафар фуқародан мурожаатлар келиб тушган. Улар сони ўтган йилнинг мос даврига қадар 97 тага ошган. Мол-мулк муносабатлари бўйича мурожаатлар 889 тага, оила-турмуш муносабатлари 245 тага, ходимларнинг ноўрин ҳатти-ҳаракатлари 66 тага, суриштирув ва тергов ҳаракатлари билан боғлиқ мурожаатлар сони 77 тага, маъмурий ҳуқуқбузарликка оид ҳужжатлар 89 тага ҳамда фуқаролик-ҳуқуқий масалалар билан боғлиқ мурожаатлар 102 тага етган.

Жорий йилнинг мос даврига қадар ўз вақтида бартараф этилмаган ва ечимини топмаган масалалар юзасидан 77 та такрорий мурожаатлар келиб тушган.  Бунда, албатта, хизмат ходимларининг ҳам эътиборсизлиги, ўз ишига масъулият билан ёндошмагани сабаб бўлган.

Вилоят ички ишлар органлари ходимларининг ҳатти-ҳаракатлари юзасидан норози бўлган мурожаатлар сони 76 тага етган. Жумладан, йўл ҳаракати хавфсизлик ходими ҳатти-ҳаракати юзасидан 2 тага, профилактика инспектори хизмати юзасидан норозилик 4 тага, текширув ҳаракатидан шикоят сони1 тага ошган. Ушбу мурожаатларнинг 9 таси ўз тасдиғини топган. Шу ҳолатларни юзага келтирган ички ишлар органлари ходимларига нисбатан интизомий чоралар кўрилган. 1 нафари қаттиқ хайфсан, 4 нафари хайфсан олди ва 4 нафар ходимга интизомий чоралар кўрилган. 4 нафар танбеҳ олган ходим масаласи йиғилишларда муҳокама қилинган. Хизмат интизомини бузган 152 нафар ходимга нисбатан турли кўринишдаги интизомий таъсир чоралари қўлланилган. Шундан 1 нафари танбеҳ, 31 нафари хайфсан, 11 нафари қаттиқ хайфсан олган. 2  нафар ходимга нисбатан ойлик маошидан сақлаш, 2 нафарининг махсус унвонини бир поғонага пасайтириш, 2 нафарини эгаллаб турган лавозимидан бўшатиш чоралари қўлланилган. 1 нафар ходимга нисбатан эса жиноий иш қўзғатилган.

Салбий холатларга кўра, 1 нафар ходим ички ишлар органлари сафидан бўшатилган. Хизмат интизомини бузиш ҳолатлари, ҳуқуқбузарлик профилактикаси бошқармаси таркибий тузилмаларидаги салбий ҳолатлар эса 2 тага, жиноят қидирув бошқармаси таркибий қисмидаги ҳолатлар 15 тага ошган. Тергов хизмати тузилмаларидаги хизмат вазифасини суистеъмол қилиш 2 тага камайган.

«Жиноятчиликка қарши курашишнинг асосий талаби фақатгина жиноятнинг оқибатлари билан курашиш эмас, балки уларнинг барвақт олдини олишдан иборат. Бу борада қатъий тизимли ишлар йўлга қўйилмоқда. Айтиш жоизки, бугунги кунда вилоятда мавжуд барча 544 та маҳалла фуқаролар йиғинларида профилактика инспектори фаолияти йўлга қўйилган. Ҳар бир профилактика инспекторига ўртача 3000 дан 5000 нафаргача аҳоли тўғри келади. Яқин кунларда аҳолиси кўп ҳудудларда профилактика инспекторлари сонини яна бир нафарга ошириш юзасидан чора-тадбирлар белгиланиши кўзда тутилган. Бу, албатта, ижтимоий муҳитни салбий ҳолатлардан янада ҳимоялашда хизмат қилади. Бундан ташқари, келгусида маҳаллаларда жиноятчиликнинг олдини олишда ҳамда ҳуқуқ-тартиботни таъминлашда оммавий ахборот воситалари ходимлари билан ҳамкорликни кучайтиришни ҳам мақсад қилганмиз. Бу жойлардаги салбий кўринишларни бартараф қилишда ижобий самара беради. Шу ўринда, айтиш жоизки, профилактика инспекториларидан, умуман тизим ходимларига қатъий талаб бор - улар ҳалол ва виждонан хизмат кўрсатиши шарт. Ички ишлар органлари фаолиятида тартиб-интизом талабини бажара олмаган, тизим юзига доғ бўлган ходимлар учун соҳада ўрин йўқ», — деди Миржамол Миралимов.