2023-yilning joriy davriga qadar Buxoro viloyat IIB tizimida faoliyat yuritib kelgan 152 nafar xodimning xizmat intizomini buzgani aniqlanib, 76 nafari ustidan murojaat kelib tushgan.

Bu haqda viloyat IIB boshlig‘i, polkovnik Mirjamol Miralimov ishtirokidagi matbuot anjumanida ma’lum qilindi, deya xabar qildi «Xabar.uz» muxbiri.

Ta’kidlanishicha, 2023-yilning mos davriga qadar Buxoroda jami 950 ta jinoyatlar qayd etilgan. Bu ko‘rsatkich 100 ming aholi soniga nisbatan o‘rtacha 47,3 tadan to‘g‘ri kelib, o‘tgan yilning 3 oyiga nisbatan 0,8 taga ko‘paygan.

Ta’kidlanishicha, bezorilik holatlari 27 taga, tan jarohati yetkazish jinoyatlari 25 taga, nomusga tegish 6 taga, talonchilik 3 taga, o‘g‘irlik 37 taga, hokimiyat vakiliga qarshilik ko‘rsatish 2 taga, qotillik jinoyati 2 taga yetgan.

«Probatsiya bo‘limlari faoliyatiga nazar tashlanadigan bo‘lsa, jami 3889 nafar nazoartdagi shaxslar bo‘lib, 1400 nafar kishi axloq tuzatish ishlariga jalb qilingan. Shaxsiy hukm qilinganlar soni 36 nafardan, muayyan huquqdan mahrum qilinganlar 346 nafardan, ozodlikni cheklash jazosini olganlar 928 nafardan iborat. Shuningdek, majburiy jamoat ishlariga 7 nafar shaxs biriktirilgan. Muddatidan ilgari shartli ozod qilinganlar 1655 nafarni, shundan yoshlar soni 56 nafarni, voyaga yetmaganlar soni 54 nafarni tashkil etmoqda. Probatsiya holatini sodir qilgan shaxslar tomonidan jami 16 ta jinoyat sodir etilishiga yo‘l qo‘yilgan»,—dedi boshqarma boshlig‘i.

Ma’lum bo‘lishicha, viloyat ichki ishlar idoralariga jami 3 876  nafar fuqarodan murojaatlar kelib tushgan. Ular soni o‘tgan yilning mos davriga qadar 97 taga oshgan. Mol-mulk munosabatlari bo‘yicha murojaatlar 889 taga, oila-turmush munosabatlari 245 taga, xodimlarning noo‘rin hatti-harakatlari 66 taga, surishtiruv va tergov harakatlari bilan bog‘liq murojaatlar soni 77 taga, ma’muriy huquqbuzarlikka oid hujjatlar 89 taga hamda fuqarolik-huquqiy masalalar bilan bog‘liq murojaatlar 102 taga yetgan.

Joriy yilning mos davriga qadar o‘z vaqtida bartaraf etilmagan va yechimini topmagan masalalar yuzasidan 77 ta takroriy murojaatlar kelib tushgan.  Bunda, albatta, xizmat xodimlarining ham e’tiborsizligi, o‘z ishiga mas’uliyat bilan yondoshmagani sabab bo‘lgan.

Viloyat ichki ishlar organlari xodimlarining hatti-harakatlari yuzasidan norozi bo‘lgan murojaatlar soni 76 taga yetgan. Jumladan, yo‘l harakati xavfsizlik xodimi hatti-harakati yuzasidan 2 taga, profilaktika inspektori xizmati yuzasidan norozilik 4 taga, tekshiruv harakatidan shikoyat soni1 taga oshgan. Ushbu murojaatlarning 9 tasi o‘z tasdig‘ini topgan. Shu holatlarni yuzaga keltirgan ichki ishlar organlari xodimlariga nisbatan intizomiy choralar ko‘rilgan. 1 nafari qattiq xayfsan, 4 nafari xayfsan oldi va 4 nafar xodimga intizomiy choralar ko‘rilgan. 4 nafar tanbeh olgan xodim masalasi yig‘ilishlarda muhokama qilingan. Xizmat intizomini buzgan 152 nafar xodimga nisbatan turli ko‘rinishdagi intizomiy ta’sir choralari qo‘llanilgan. Shundan 1 nafari tanbeh, 31 nafari xayfsan, 11 nafari qattiq xayfsan olgan. 2  nafar xodimga nisbatan oylik maoshidan saqlash, 2 nafarining maxsus unvonini bir pog‘onaga pasaytirish, 2 nafarini egallab turgan lavozimidan bo‘shatish choralari qo‘llanilgan. 1 nafar xodimga nisbatan esa jinoiy ish qo‘zg‘atilgan.

Salbiy xolatlarga ko‘ra, 1 nafar xodim ichki ishlar organlari safidan bo‘shatilgan. Xizmat intizomini buzish holatlari, huquqbuzarlik profilaktikasi boshqarmasi tarkibiy tuzilmalaridagi salbiy holatlar esa 2 taga, jinoyat qidiruv boshqarmasi tarkibiy qismidagi holatlar 15 taga oshgan. Tergov xizmati tuzilmalaridagi xizmat vazifasini suiste’mol qilish 2 taga kamaygan.

«Jinoyatchilikka qarshi kurashishning asosiy talabi faqatgina jinoyatning oqibatlari bilan kurashish emas, balki ularning barvaqt oldini olishdan iborat. Bu borada qat’iy tizimli ishlar yo‘lga qo‘yilmoqda. Aytish joizki, bugungi kunda viloyatda mavjud barcha 544 ta mahalla fuqarolar yig‘inlarida profilaktika inspektori faoliyati yo‘lga qo‘yilgan. Har bir profilaktika inspektoriga o‘rtacha 3000 dan 5000 nafargacha aholi to‘g‘ri keladi. Yaqin kunlarda aholisi ko‘p hududlarda profilaktika inspektorlari sonini yana bir nafarga oshirish yuzasidan chora-tadbirlar belgilanishi ko‘zda tutilgan. Bu, albatta, ijtimoiy muhitni salbiy holatlardan yanada himoyalashda xizmat qiladi. Bundan tashqari, kelgusida mahallalarda jinoyatchilikning oldini olishda hamda huquq-tartibotni ta’minlashda ommaviy axborot vositalari xodimlari bilan hamkorlikni kuchaytirishni ham maqsad qilganmiz. Bu joylardagi salbiy ko‘rinishlarni bartaraf qilishda ijobiy samara beradi. Shu o‘rinda, aytish joizki, profilaktika inspektorilaridan, umuman tizim xodimlariga qat’iy talab bor - ular halol va vijdonan xizmat ko‘rsatishi shart. Ichki ishlar organlari faoliyatida tartib-intizom talabini bajara olmagan, tizim yuziga dog‘ bo‘lgan xodimlar uchun sohada o‘rin yo‘q», — dedi Mirjamol Miralimov.