Наманганда 77 яшар фуқарога туғилганлик гувоҳномаси берилди. Бу ҳақда вилоят адлия бошқармаси матбуот хизмати хабар берди. 

1949 йилда туғилган Раҳманов Турсунбой бу кунни узоқ кутди. У туғилганлик ҳақидаги гувоҳномаси ҳамда собиқ Совет Иттифоқи даврида олган паспортини йўқотиб қўйгани сабабли шу кунгача Ўзбекистон фуқаролигини расмийлаштира олмай келган.

​Фуқароликни тасдиқловчи зарур ҳужжатларга эга бўлмагани боис Турсунбой ака шу пайтгача нафақа ҳам ололмаган. Бу ҳолат унинг кундалик ҳаётида қатор қийинчиликларни келтириб чиқарган.

​Муаммо ечимини излаб, у Наманган тумани ФҲДЁ бўлимига мурожаат қилди.

​Мурожаатчи билан суҳбат давомида унинг шу кунгача Ўзбекистон фуқаролиги паспортини олмагани, шунингдек, доимий яшаш манзилига эга бўлмагани маълум бўлди.

​ФҲДЁ бўлими ходимлари томонидан мавжуд ҳолат атрофлича ўрганилиб, зарур маълумотлар олинди. Натижада Турсунбой аканинг туғилганлик ҳақидаги гувоҳномаси такрорий тартибда тикланиб, унга тантанали равишда топширилди.

​Эндиликда Турсунбой ака мазкур гувоҳнома асосида фуқаролик масаласини қонуний тартибда ҳал этиш юзасидан судга мурожаат қилиши ҳамда белгиланган тартибда Ўзбекистон фуқаролигини расмийлаштириш имкониятига эга.

​Фуқаролик масаласи ҳал этилгач, қонунчиликда белгиланган талаблар асосида пенсия ва бошқа ижтимоий тўловлардан фойдаланиш масаласини ҳам қонуний тартибда ҳал этиш имконияти юзага келади.