4 йилдан буён бир нафар фарзандининг моддий таъминоти учун алимент тўловини пайсалга солиб, турли баҳоналарни рўкач қилиб юрган ота қимматбаҳо «Chery» русумли автомашинаси жарима майдонига қўйилгач, ундирувчига қарзини тўлиқ қоплаб беришга мажбур бўлди.

«Xabar.uz»га маълум қилинишича, қарздор отанинг қарздорлиги 2020 йилдан ҳозирга қадар салкам 30 миллион сўмни ташкил қилган. Ўзини «ночор» кўрсатиб келган қарздорнинг ҳолати ижро ҳаракатлари давомида «МИБ-Портал» элетрон дастурида берилган сўровлар орқали ўрганилган.

Натижада қарздор номида «CHERY ARIZO 6 PRO» русумли автотранспорт воситаси мавжудлиги аниқланган. Автотранспорт воситасига нисбатан қидирув эълон қилинган ва машина топилган. Алимент тўламаган отанинг «Chery»си жарима майдончасига қўйилган. Қарздорликни бартараф этиш учун қарздорга муддат берилган. Қарздорлик тўлиқ бартараф қилинмаган тақдирда, автомашина сотиш учун аукцион савдоларига чиқарилиши мумкинлиги ҳақида огоҳлантирилган.

«Chery»га пули бор, аммо, фарзанди таъминоти учун алимент тўлашга «пули йўқ», автомашинани фарзанди тақдиридан устун қўйган оталар сафи, афсуски, кўпайган»,-дейди Бюронинг Бухоро вилояти бошқармаси масъул ходими.