Президент Шавкат Мирзиёев бугун ёшлар масаласи бўйича видеоселектор ўтказмоқда.

«Xabar.uz» мухбирининг маълум қилишича, давлат раҳбари йиғилиш аввалида ёшлар бўйича ташаббусларни амалга оширишда сусткашликка йўл қўйилаётганини таъкидлаб ўтди.

— Йил бошидан буён ёшлар масаласида иккинчи маротаба видеоселектор йиғилиши ўтказаётганимиз бежиз эмас. Чунки бу масалада олиб борилаётган ишлардан норозиман. Баъзи туман ҳокимлари масъулиятни ҳис эта олмаяпти.

Жорий йилда ёшларни қўллаб-қувватлаш бўйича, олдимизга катта марра ва муҳим вазифаларни белгилаб олганмиз.

Январь ойида ўтказилган йиғилишда 2 та устувор йўналиш – ёшларнинг бандлиги ва уларнинг бўш вақтини мазмунли ташкил этиш бўйича топшириқлар берилган эди. Аммо бу топшириқлар ижроси бўйича қилинаётган ишлар талабга жавоб бера олмайди, — деди Шавкат Мирзиёев.

Йиғилиш давомида мисол тариқасида таъкидланишича, Андижон вилоятида 80 минг нафар ишсиз ёшлардан, биринчи чоракда 35 минг 600 нафарининг бандлиги таъминланган бўлса, шундан бор-йўғи 5 мингга яқини доимий ишларга жойлаштирилган, холос.