Тошкент вилояти Қибрай туманидаги «Энергетиклар» сиҳатгоҳида каратинда бўлган етти нафар фуқарога нисбатан  суд тартибида чора кўрилди. Бу ҳақда «Xabar.uz»га  Олий суд матбуот хизмати раҳбари Азиз Обидов маълум қилди.

Айни фуқаролар (уч нафар эркак, тўрт нафар аёл) БААнинг Дубай шаҳридан мамлакатимизга қайтгач, белгиланган тартибда қайд этилган сиҳатгоҳга жойлаштирилиб, каратинга олингани айтилади.  Ҳамма бало шундаки, ўзлари каратинда эканига қарамай шу йилнинг 1 апрель куни  белгиланган қоидаларига амал қилмасдан, ҳар хил уятли сўзлар билан ушбу сиҳатгоҳда сақланаётган бошқа фуқароларнинг тинчлигини бузганидан ташқари ички ишлар органлари ходимларининг қонуний талабларини бажаришдан бош тортишади.

Натижада уларнинг барчасига нисбатан маъмурий ҳуқуқбузарликка оид ҳужжат расмийлаштиришдан бошқа чора қолмайди.

Бугун Юқоричирчиқ туман маъмурий суди мазкур фуқароларга нисбатан қўзғатилган маъмурий ҳуқуқбузарликка оид ишлар мазмунан кўриб чиқилди.

Суд якунига кўра, уларнинг барчаси Ўзбекистон Республикаси Маъмурий жавобгарлик тўғрисидаги кодексининг 54-моддаси (эпидемияларга қарши курашиш қоидаларини бузиш), 183-моддаси (майда безорилик) ва 194-моддасида (ички ишлар органлари ходимининг қонуний талабларини бажармаслик) назарда тутилган ҳуқуқбузарликларни содир этган деб топилиб, ҳар бирига 15 сутка маъмурий қамоқ жазоси тайинланди.

Олий маҳкама матбуот хизмати алоҳида таъкидлайдики, бугунги кунда  юртимизда карантин тартиби жорий этилган бўлиб, фуқароларимизни коронавирус инфекциясидан ҳимоя қилиш ва ушбу инфекцияга чалинганларни даволаш борасида изчиллик билан кечиктириб бўлмайдиган чоралар кўрилаётган бир вазиятда юқорида қайд қилинган каби ҳуқуқбузарликларга муросасиз бўлиш талаб этилмоқда. Бундан ҳар ким тегишли хулоса чиқариши керак.