Қозоғистонда коронавирусдан ҳам хавфлироқ касаллик тарқалаётганини маълум қилинганди. Бу қанақа касаллик ўзи? Қозоғистон соғлиқни сақлаш вазирлиги бу хабарларга қандай муносабатда?

Бу – зотилжамнинг номаълум кўриниши. Бу ҳақда South China Morning Post нашри Хитойнинг Қозоғистондаги элчихонасига таяниб хабар берди.

Хитой элчихонаси зотилжамнинг янги кўриниши COVID-19дан ҳам анча хатарли эканини қайд этар экан, ҳали касаллик илмий жиҳатдан тўлиқ тадқиқ этилмаганини билдирган.

Қайд этилишича, жорий йил июнь ойи ўрталарида Қозоғистоннинг Чимкент, Оқтўбе ва Атирау вилоятларида зотилжамнинг номаълум тури билан касалланиш ҳолати сезиларли даражада кўпайган. Бу борада ўлим кўрсаткичи COVID-19дан ҳам каттароқ.

Маълумотларга қараганда, жорий йилнинг биринчи ярмида Қозоғистонда зотилжамдан 1772 киши вафот этган. Июнь ойининг ўзида эса 628 та ўлим ҳолати қайд этилган.

Хитой элчихонасига кўра, мазкур уч вилоятда 500 га яқин маҳаллий аҳоли зотилжамнинг номаълум турига чалинган, улардан 30 нафарининг аҳволи ўта оғир.

Қозоғистон соғлиқни сақлаш вазирлиги зотилжамнинг номаълум кўриниши ҳақидаги хабарни рад этган. Бу борадаги хабарларни ҳақиқатдан йироқ деб атаган.

Қозоғистон ҳудудида COVID-19 инфекциясига чалиниш ҳолати илк бор расман 2020 йил 13 мартда қайд этилди. Касаллик авж олмаслиги учун мамлакатда 16 мартдан 11 майга қадар фавқулодда ҳолат тартиби амал қилди. Инфекция яна кенг тарқалиши ортидан кучайтирилган карантин тартиби қайта тикланди. Мамлакат президенти Қосим-Жўмарт Тўқаев 13 июль санасини коронавирусдан вафот этганлар хотирасига ҳурмат рамзи сифатида мотам куни деб эълон қилди.

Расмий маълумотларга кўра, Қозоғистонда COVID-19 инфекциясига чалинганлар сони 55 мингга яқинлашди. Хасталикдан шифо топганлар сони – 31815.  Ҳозирга қадар 264 та ўлим ҳолати қайд этилган.