«Euronews» хабар беришича, Франция ҳарбий-денгиз флотининг энг йирик кемаси — «Шарль де Голль» авиаташувчисига ҳам коронавирус кириб борди: касаллик 50 нафар ҳарбий-денгизчида аниқланди.

Бу ҳақда маълум қилган мамлакат мудофаа вазирлиги кема миссиясини муддатидан олдин тугатиб, портга қараб йўл олганини маълум қилди. Касалларнинг уч нафари Тулондаги ҳарбий госпиталга вертолётда келтирилди, қолганлар карантинга олинган.

Ҳарбий кема бортида 1760 киши бўлган. Уларни ҳарбий шифокорлар текшириб даволашяпти. Ҳозирча 66 та тест олинган, ташхис қўйиш давом этяпти, касаллар сони ошиши мумкин.

Бунгача  АҚШнинг атом авиаташувчиси — «Теодор Рузвельт»да ҳам COVID-19 эпидемияси бошланиб кетганди. Ушбу кема бортида 5000 нафар денгизчи хизмат қилади. Шу кема капитанининг ОАВ қўлига тушиб қолган хати ортидан катта можаро келиб чиққан, шундан сўнг капитан вазифасидан олинган, АҚШ Ҳарбий-денгиз кучлари вазири вазифасини бажарувчи ўз ихтиёри билан истеъфога чиқиб кетганди.

Кейинчалик Американинг яна учта авиаташувчисида коронавирус аниқланди.