«Хоразм» нашриёти томонидан жаҳон адабиётнинг юксак намунаси саналган «Ревизор» комедияси қайта босмадан чиқди.

Бундан 20 йил муқаддам Н.В.Гоголнинг ушбу асарига мурожаат қилган Огаҳий номидаги вилоят мусиқали комедия ва драма театри директори  Қурбон Муҳаммадризо  кутилмаган мусибатга гирифтор бўлган эди. Яъники, машҳур комедияни саҳналаштириб, унинг тақдимотига маҳаллий раҳбарларни таклиф қилган театр директори уч кун ўтиб коррупцияда айбланиб, ҳибсга олинади.

Ана шундан буён Хоразм ижодий муҳитида Николай Гогол асарига қайтиб иш кўришга ҳеч ким журъат қилолмади.

Абдулла Қаҳҳор ва Кибриё Қаҳҳорова таржимасида «Ревизор» асари бир неча марта пойтахт нашриётларида чоп қилинган, театр саҳналарида намойиш қилинган.

Даврлар ўтиб, она тилимизга бўлган эътибор ва муносабат ўзгарди. Машҳур ижодкорлар томонидан қилинган таржимада русча атамалар кўп учрашини инобатга олсак, бугунги кунда китобни қайта нашр қилдириш зарур эди.

- Биз пьесани қайта нашр этишга яхши ният билан бел боғладик.  Таҳрир жараёнида ўзбек тилининг ҳозирги қонуниятлари   эътибор қаратилди, - дейди «Хоразм» нашриёти директори  Темур Тангриберганов. – Мисол учун устоз таржимонлар «сўм» сўзини ишлатишган. Ваҳоланки, Россия пул бирлиги «рубл» деб аталади. «Засидатель», «план», «слесарь», «сафер» каби ўнлаб русча сўзлар бугунги кунда ўзбек адабий тилидаги муқобили билан истифода этиляпти. Шу сабабдан ҳам ушбу асар қайта таҳрир ва нашрга муҳтож эди.

- Бугунги кунда мамлакатимизда коррупция ва порахўрликка қарши кураш давлат сиёсати даражасидаги муҳим вазифага айланган, - дейди Ўзбекистон Ёзувчилар уюшмаси аъзоси, «Ижод» жамғармасининг Хоразм вилоят бўлими раҳбари Исмоил Оллаберганов. – «Ревизор» асарини қайта китоб ҳолида кенг халқ оммасига тақдим қилиш коррупцияга қарши курашда чуқур масъулиятни ҳис қилишга омил бўлиши шубҳасиз.

Эрпўлат Бахт