Жорий йилнинг 1 апрель куни тунда Бухоро шаҳрида ака-укалар томонидан уюштирилган манёвр аянчли якун топди, дея «Xabar.uz»га маълум қилмоқда Бухоро вилояти ИИБ ЖХХ ЙҲХБ Ахборот хизмати бошлиғи, капитан Улуғбек Шукурлаев.

Таъкидланишича, Бухоро шаҳрида яшовчи 19 ёшли А.Ж. ва Бухоро шаҳридаги 1-умумий ўрта таълим мактабининг 11-синф ўқувчиси, вояга етмаган 17 ёшли Р.Ж.лар автомашина бошқариш ҳуқуқини берувчи ҳеч бир ҳужжати бўлмаган ҳолда отасига тегишли бўлган Gentra ва Monza автомашиналарни тунда бошқариб чиқиб, шаҳар кўчаларида хавфли ҳаракатларни амалга оширишган.

Ўз ҳаддини билмай, истаганча машина бошқарган ака-укалар келишган ҳолда бир нуқтада қарама-қарши ҳаракатланиб, узаро тўқнашиб кетган. Оқибатда ҳар иккала автомашина ҳайдовчилари ҳаёти учун хавфли бўлган жиддий тан жароҳати билан касалхонага олиб кетилган.

«Рул бошқарувида бўлган болаларнинг хатти-ҳаракатларига ота-оналар бош сабабчи. Чунки, болаларига автомашинани бошқаришни бегоналар эмас, ўз ота-онаси ўргатади. Қолаверса, автомашина калитини ҳам ўз қўллари билан топшириб қўйишади. Ҳар иккала автомашинага ҳам жиддий техник зарар етган ва улар  жарима майдонига жойлаштирилди. Ота-оналардан ҳам илтимос ва ҳам талабимиз шу:  болаларингизни ўз қўлларингиз билан ўлим сари йулламанг ва кўрганларингиздан бугун хулоса чиқаринг» – деди Улуғбек Шукурлаев.

Билдирилишича, болаларнинг ота-онаси бундан илгари ҳам мактаб маъмурияти томонидан бир неча маротаба огоҳлантирилган. Мактабга ўзини кўз-кўз қилиш учун доимий тарзда автомашина бошқариб келадиган ўқувчи бир маротаба маъмурий жазога ҳам тортилган.