Франциянинг Le Monde Анорбанкнинг асосий акционери Қаҳрамон Олимовнинг 23 июн куни Париж шаҳрида ўғирлаб кетилгани ва Ницца яқинида жойлашган вилладаги икки кунлик тутқунликдан сўнг тўлаб берилган гаров пули эвазига қўйиб юборилгани ҳақида хабар тарқатди.

Гап шундаки, 48 ёшли банкир Франциянинг EDF компанияси билан ҳамкорликда Сурхондарё вилоятида газ циклли электр станцияси қурилишида иштирок этмоқда. У Парижга айни шу лойиҳа доирасида француз ҳамкорлари билан учрашиш мақсадида борган. 21 июнда Тошкентдан учган Олимов, Истанбул орқали Парижга қўнган.

Ўзбекистонлик банкирнинг ўғирланиш воқеаси ўша куни у 9 кечага жой банд қилинган Sofitel Arc-de-Triomphe меҳмонхонасида ўзини Анастасия деб таништирган рус ва инглиз тилларида сўзлашувчи аёл билан суҳбатдан бошланган.

Икки кунлик тутқунликдан сўнг шифокорлар кўригида Олимовнинг танасида кўкарган жойлар ва яралар борлигини қайд этишган. Нашрнинг ёзишича, бемор ҳаддан ташқари хавотир ва уйқу билан боғлиқ муаммоларидан шикоят қилган.

Le Monde, шунингдек, банкирнинг ташрифидан камчилик, жумладан, нотариус, EDF компанияси раҳбарияти ҳамда Sofitel Arc-de-Triomphe меҳмонхонасигина хабардор бўлганига эътибор қаратган.

Ҳолат юзасидан «гуруҳ бўлиб, шахсни ноқонуний ушлаб туриш» моддаси билан жиноят иши қўзғатилган ва бир киши қамоққа олинган.