Трамп АҚШ ва Хитой савдо битими имзолаганини маълум қилди.

«Кеча биз Хитой билан шартнома имзоладик», – деди Трамп Оқ уйда щтган тадбирда. АҚШ президенти савдо келишуви ҳақида ҳеч қандай маълумот бермаган.

АҚШ Савдо вазири Говард Лутник АҚШ ва Хитой май ойида Женевада эришилган савдо келишувини якунлаганини тушунтирди. Унинг сўзларига кўра, келишув икки кун аввал имзоланган ҳамда Пекин ва Вашингтон ўртасидаги савдо музокараларида келишилган шартларни ўзида мужассам этган. Улар орасида Хитойнинг АҚШга ноёб металларни етказиб бериш мажбурияти ҳам бор.

«Улар бизга ноёб металларни етказиб беради. Шундайн сўнг биз жавоб чораларини бекор қиламиз», – деди Лутник Bloomberg News билан суҳбатда.

Унинг қўшимча қилишича, Оқ уй яқин келажакда ўзининг энг йирик ўнта савдо ҳамкори гуруҳи билан савдо битимлари тузишни режалаштирмоқда.

Оқ уй вакилининг айтишича, АҚШ ва Хитой Женева битими шартлари бўйича келишиб олган. Хитойнинг Вашингтондаги элчихонаси изоҳ беришдан бош тортган ва Хитой Ташқи ишлар вазирлиги ҳам изоҳ бериш сўровига жавоб бермаган. Трамп апрел ойида бошлаган дунёнинг аксарият давлатлари билан савдо уруши даврида Хитой билан ўзаро тарифлар Вашингтон томонида 145 фоизга, Пекин томонида 125 фоизга етди. Июн ўрталарида Трамп Қўшма Штатлар ва Хитой савдо битими тузишга келишиб олганини маълум қилганди. Унинг қўшимча қилишича, Пекин Қўшма Штатларга магнит ва ноёб қазилма ресурсларини етказиб беради, Вашингтон эса хитойлик талабаларга Америка коллежлари ва университетларида ўқишга рухсат беради.