АҚШнинг Ўзбекистондаги элчихонаси 9 май – Иккинчи жаҳон урушида қозонилган ғалаба санаси муносабати билан баёнот берди. Унда бу сана Ўзбекистонда Хотира ва қадрлаш куни сифатида байрам қилиниши алоҳида таъкидланади.

«Ушбу Хотира ва қадрлаш кунида Ўзбекистон халқини Иккинчи жаҳон урушида иттифоқчи кучларнинг нацизм устидан қозонган ғалабасининг 77 йиллиги билан табриклаймиз. Бугун биз Америка Қўшма Штатлари, Буюк Британия ва бошқа иттифоқчи давлатлар билан биргаликда Совет қўшинларининг 34 миллион аъзоси сафида хизмат қилган 530 мингдан ортиқ ўзбекистонлик қўшган ҳисса ва қурбонларни хотирлаймиз ҳамда шарафлаймиз. Биз уларга, уларнинг оилалари ва авлодларига чуқур ҳурмат бажо келтирамиз»,  – дейилади баёнотда.

Элчихона бугунги куннинг энг оғриқли мавзуси – Россиянинг Украинага босқинига муносабат билдирар экан, инсониятни қоронғи ўтмишга қайтариш йўлидаги бу каби уринишларга асло йўл қўйиб бўлмаслигини урғулайди.

«9 май тинчлик ва озодлик ғалабаси сифатида нишонланаётган бир паллада, афсуски, бугунги кунда ҳам 1945 йилдан аввал бўлгани каби даҳшатли хатти-ҳаракат кўринишига гувоҳ бўлмоқдамиз: яъни бир давлат ўз қўшнисини бўйсундириб, унинг ҳудудини куч билан босиб олишга уринмоқда. Биз дунёмизни бундай қоронғи ва хатарли ўтмишга қайтишига сира йўл қўя олмаймиз. Шу боис биз бундай ҳаракатларни қоралаймиз ҳамда ўз мустақиллиги, суверенитети ва ҳудудий яхлитлигини ҳимоя қилишга интилаётган барча халқларнинг жасоратини эътироф этамиз», – деб таъкидланади расмий муносабатда.

Дипломатик ваколатхона зулмга қарши курашда Ўзбекистон ва Америка Қўшма Штатлари ўртасидаги муштарак тарихни эҳтиром билан ёдга олган ва ғурурли мустақил Ўзбекистон халқига эзгу тилаклар билдирган.

Эслатиб ўтамиз, яқинда АҚШ элчиси Дэниел Розенблюм Ўзбекистоннинг Украинадаги уруш бўйича бетараф позиция эгаллаганига муносабат билдирганди.

Жорий йил 9 март куни Вашингтонда ташқи ишлар вазири Абдулазиз Комилов билан учрашган давлат котиби Энтони Блинкен эса АҚШ томони Ўзбекистоннинг суверенитети, мустақиллиги ва ҳудудий яхлитлигига буткул содиқ эканини таъкидлаганди.