Бош прокуратура «Антиструмин иши» бўйича расмий баёнот берди
![Бош прокуратура «Антиструмин иши» бўйича расмий баёнот берди](http://static.xabar.uz/crop/2/6/720_460_95_2695319448.jpg)
«Антиструмин» дори воситаси билан боғлиқ жиноят иши юзасидан Бош прокуратура томонидан жиноят-процессуал қонунчилик асосида дастлабки тергов ҳаракатлари ўтказилмоқда.
«Ҳозирги кунда мазкур жиноят иши юзасидан тергов ҳаракатлари якунига етмаган бўлсада, жиноят иши доирасида 3 нафар аёллар қамоққа олинганлиги ҳақидаги маълумотлар ҳар хил талқин қилинган ҳолда оммавий ахборот воситаларида тарқатиб келинмоқда.
Тарқатилаётган ушбу маълумотлар терговнинг объектив ва холисона олиб борилишига халақит қилмоқда.
Жиноят-процессуал кодекси талабларидан келиб чиқиб, тергов ҳаракатлари олиб борилаётган вақтда шахсга доир маълумотларни тарқатиш ва терговга аралашиш қонун билан тақиқланишини эслатиб ўтамиз.
Ҳурматли оммавий ахборот воситалари вакиллари ва ижтимоий тармоқ фойдаланувчилари, тергов тугагунига қадар ижтимоий тармоқларда ушбу жиноят ишига оид маълумотларни тарқатмасликка чақирамиз.
Тергов натижаси ҳақида қўшимча равишда маълум қилинади», дейилади расмий баёнотда.
Куни кеча Олий суд матбуот хизмати Жиноят ишлари бўйича Яшнобод туман судининг 2023 йил 7 ва 16 ноябрь кунларидаги ажримлари билан Бош прокурор ўринбосарининг илтимосномаларига кўра, 3 нафар гумон қилинувчига нисбатан қамоққа олиш тарзидаги эҳтиёт чораси қўлланилиб, тергов ҳибсхонасига жойлаштирилганини хабар қилганди.
Эслатиб ўтамиз, жорий йил 22 сентябр куни Наманган вилоятининг Чуст туманида ўнлаб болаларнинг бепул тарқатилган йод препарати истеъмоли сабаб заҳарлангани ҳақида хабарлар тарқалган эди.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter