«Бундан яхшиси бўлмайди» — Трамп ҲАМАСни Исроил билан келишувга чақирди

Исроил америкалик вакиллар билан музокаралардан сўнг, Ғазо секторида ўт очишни тўхтатиш бўйича 60 кунлик келишув учун «зарур шартлар»га рози бўлди. Бу ҳақда АҚШ президенти Доналд Трамп баёнот берди.
Шу муддат ичида урушга нуқта қўйиш учун Қўшма Штатлар барча томонлар билан ишлайди, якуний таклифни эса Қатар ва Миср тақдим этади, деди Трамп.
«Умид қиламанки, Яқин Шарқ ҳаққи ҲАМАС бу келишувга розилик беради, чунки бундан яхшиси бўлмайди — ФАҚАТ ЁМОН БЎЛАДИ», — деб ёзди Трамп Truth Social ижтимоий тармоғида.
Исроилнинг стратегик режалаштириш вазири Рон Дермер Вашингтонга келган. The Times of Israel ёзишича, у Трампнинг Яқин Шарқ бўйича махсус элчиси Стив Уиткофф, давлат котиби Марко Рубио ва вице-президент Жей Ди Вэнс билан музокаралар ўтказган. Учрашув узоқ ва сермаҳсул бўлди, деди Трамп.
АҚШ таклиф қилаётган 60 кунлик ярашув охирги ойларда кўп муҳокама қилиняпти. Al Arabiya ва Al Jazeera ёзишича, келишув бир неча босқичда гаровдаги тирик қолган исроилликларни озод қилиш ва ўлганларнинг жасадларини фаластиклик маҳбусларга алмаштиришни кўзда тутади. Исроил ўз ҳужумларини тўхтатиши, алмашинувлардан сўнг, қўшинларини секторнинг жанубига кўчириши шарт. Бундан ташқари, ярашувнинг биринчи кунидан ўт очишни доимий тўхтатиш бўйича музокаралар бошланади.
Май ойи охиридаги баёнотида Беямин Нетаняҳу АҚШнинг режасини қабул қилишини айтганди. ҲАМАС эса таклифни ўрганиб чиқаётгани ва «халқ манфаатига хизмат қилувчи» қарорга келишини маълум қилганди. Якунда ўт очишни тўхтатиш муддати (60 кун) тугагач, нималар бўлиши борасида томонлар бир ёқадан бош чиқара олмасдан, музокаралар боши берк кўчага кириб қолган.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter