Ижтимоий тармоқларда Халқ депутатлари Жиззах вилояти кенгаши сессиясида депутатлардан вилоят ҳокимига савол бермаслик талаб қилингани, қолаверса депутатлар телефон билан сессияга киритилмаслиги ҳақида огоҳлантирилгани ҳақида хабар тарқалди.

Ушбу ҳолатга Олий Мажлис Қонунчилик палатаси депутати Расул Кушербаев муносабат билдирди.

«Биринчидан, депутат — халқ вакили. У халқ номидан ҳар қандай мансабдор шахсга савол бериши мумкин.

Аслида нафақат депутат, балки оддий фуқаронинг ҳам ҳокимга савол беришга ҳуқуқи бор. Уни чеклаш учун алоҳида шунга оид қонун бўлмаса, тақиқлаш мумкинмас.

Иккинчидан, депутатларга нисбатан бундай талаблар Конституцияга амал қилинмайдиган, мустақил автократлашиб бораётган ҳудудда содир бўлиши мумкин.

Учинчидан, депутатда мол-мулкига нисбатан ҳам дахлсизлик ҳуқуқи мавжудлиги сабабли, сессияга шахсий  телефонлари билан киритмаслик бўйича чеклов ўрнатилиши ҳам ғайриқонуний», деб ёзади у.

Орадан кўп вақт ўтмай, Жиззахда ўтказилиши кутилаётган сессия масаласида расмий муносабат билдирилди.

Дастлаб депутатлар сессияга телефон билан киритилмаслиги билдирилган бўлса, танқиддан сўнг мажлисга ҳалақит бермаслик учун овозсиз режимга ўтказилади, дея қайд этилган.

«Сессияга "расмий кийимда" келишлари керак, дейилган жойи тушунарсиз. Чунки ўзим ҳам "расмий кийим" нима эканлигини билмайман. Қонунчиликда бунинг тушунчаси йўқ афсуски: европача костьюмми, қора кўйлакми ёки миллий чопонми ҳалиям номаълум», дея муносабат билдирди Расул Кушербаев.

Шунингдек, у бир нарсани эсдан чиқармаслик кераклигини эслатган: депутат мактаб боласи эмас, у минглаб одамлар томонидан сайланган мустақил шахс.

«Оқ куйлакда кел, телефонни ўчириб кел, саволсиз кел, каби гаплар мактаб боласига айтилади. Ўзи "Кенгаш раиси масаласи" ҳал бўлмагунча маҳаллий депутатлар ишида ўнгланиш бўлмаслиги кўриниб турибди», қайд этади депутат.