Ўзбекистондаги энг ёш ва энг ёши улуғ абитуриентлар ҳақида материал тайёрлаш давомида ЎзА қизиқ бир вазиятга дуч келган.

Гап шундаки, 22 июль куни Давлат тест маркази томонидан ўтказилган матбуот анжуманида энг ёш ва энг ёши улуғ абитуриентлар ҳақида ҳам маълумот берилган эди. Жумладан, энг ёш абитуриент 13 ёш ва энг ёши катта абитуриент 95 ёш эканлиги хабар қилинганди.

Дастлаб 13 ёшли (14 ёшга тўлмаган) эканлиги айтилаётган Х.А. исмли абитуриент суриштирилган. У мактабда ўқиш жараёнида 1-синфдан 11-синфгача тўлиқ таълим олган, яъни ўқиш даврида синфдан синфга сакратилмаган.

Ушбу маълумотлардан сўнг, ўз-ўзидан савол туғилади, қандай қилиб 13 ёшли абитуриент 2009 йилда мактабга чиқиши мумкин, ахир бу пайтда у атиги 2 ярим ёш бўладику?

Шундан сўнг, Халқ таълими вазирлиги кўмаги билан Х.А. истиқомат қиладиган туманнинг ФҲДЁ бўлими орқали унинг туғилган вақтига аниқлик киритилди. Берилган расмий маълумотга кўра, Х.А. 2003 йил 3 декабрда таваллуд топган. Бундан келиб чиқадики, у аслида 16 ёш (декабрь ойида 17 ёшга тўлади) ҳамда мактабнинг 1-синфига қабул қилинган пайтда 6 ёш бўлган.

Шундан сўнг, нима учун Давлат тест маркази ушбу абитуриентни 13 ёш дея эълон қилганига аниқлик киритиш учун суриштирув давом эттирилган.

Аниқлаган маълумотларга кўра, Х.А.га 2019 йил апрель ойида туман ички ишлар бўлими томонидан 2006 йил 3 декабрда туғилганлиги акс этган фуқаролик паспорти берилган. Фуқаролик паспорти расмийлаштирилаётганда, маълум бўлмаган сабабларга кўра, Х.А.нинг ёши 3 йилга кичрайтирилган.

Шунингдек, ЎзА суриштирувлари давомида Х.А. футболчилик фаолияти билан шуғулланиши ҳақидаги дастлабки маълумотларни қўлга киритган.

ЎзПФЛ маълумотига кўра, вояга етмаган Х.А. ҳақиқатдан футболчилик фаолияти билан шуғулланади ва туманидаги болалар-ўсмирлар спорт мактабида рўйхатда турган, профессионал футбол лигасида ҳозирча ўйинлар ўтказмаган.

Суриштирувлар давомида тўпланган барча материаллар қонун доирасида кўриб чиқилиши учун Бош прокуратурага тақдим этилган.