Куни кеча Туркия президенти Aнқара шаҳар шифохонасида коронавирусга қарши эмлангани ҳақида хабар бергандик.

Ражаб Тоййиб Эрдўғон коронавирусга қарши эмланганнинг эртаси куни ўзини яхши ҳис қилаётганини ва 28 кундан сўнг вакцинанинг иккинчи дозасини олишини маълум қилди.

«Вакцинациядан сўнг менда ҳеч қандай ножўя таъсирлар кузатилмади, ўзимни жуда яхши ҳис қиляпман. 28 кундан сўнг иккинчи дозани қабул қилмоқчиман», — деди Эрдўғон журналистларга.

Пайшанба куни Туркияда Хитойнинг «SinoVac» компанияси вакцинаси билан эмланиш бошланди. У тўрт босқичда амалга оширилади. Дастлаб вакцина шифокорлар ва хавф остида бўлганлар томонидан қабул қилинади, вакцинациянинг биринчи босқичи 9 миллионга яқин одамни қамраб олиши кутилмоқда. Дастлабки икки кунда 500 мингга яқин одам вакцинани қабул қилади.

Туркия соғлиқни сақлаш вазири Кожа Хитойнинг «SinoVac» компанияси вакцинани етказиб беришни бошлаганини эълон қилган эди. Туркия февралнинг охирига қадар 50 миллион дозани олишни кутмоқда. Шунингдек, Туркия ҳукумати март ойининг охирига қадар Aмериканинг «Pfizer» компанияси ҳамда унинг немис ҳамкори «BioNTech» томонидан ишлаб чиқарилган 4,5 миллион доза коронавирусга қарши вакцинани сотиб олмоқчи.