Педиатрнинг айтишича, нотўғри танланган ёки ҳаддан ташқари оғир портфел (тўғрироғи, рюкзак) суяк-мушак тизими ҳали шаклланиш жараёнида бўлган болалар ва ўсмирларнинг нафақат қоматига, балки ички аъзолари фаолиятига ҳам салбий таъсир кўрсатиши мумкин.

Шунинг учун рюкзак танлаш ва уни олиб юришга алоҳида эътибор қаратиш лозим.

Сумка ёки рюкзакни доим бир елкада кўтариш сколиозни шакллантириши мумкин. Оғир рюкзак елка камари ва белни зўриқтиради, оқибатда бола олдинга ёки ёнга энгашиб юришга мажбур бўлади, бунинг оқибатида ички аъзоларнинг сиқилиши, қон айланишининг бузилиши, нафас олишнинг қийинлашиши, юрак уришининг тезлашиши ва бош айланиши каби салбий ҳолатлар келиб чиқиши мумкин.

Ҳаддан ташқари зўриқиш, қолаверса, оёқларга ҳам зарарли: юришни оғирлаштиришдан ташқари, оёқ ва бел оғриғини келтириб чиқаради, оёқ бўғимларида патологик ўзгаришларга олиб келиши мумкин.

Юкламани камайтириш учун рюкзак боланинг елка кенглигида, юқори чеккаси елка баландлигида, пастки чеккаси бел баландлигида бўлиши керак. Боғичлари юмшоқ ва кенг (4-8 см), созланувчан бўлиши керак. Йўлда хавфсизлик учун ёруғликни қайтарувчи элементлар бўлгани мақсадга мувофиқ.

Рюкзакнинг оғирлиги:

• бошланғич синф ўқувчилари учун — 700 граммгача;
• ўрта ва юқори синфлар учун — 1 килогача бўлиши керак.

Дарсликлар ва ўқув қуролларининг оғирлиги қуйидаги меъёрдан ошмаслиги зарур:

• 1-2-синфлар — 1,5 кг;
• 3-4-синфлар — 2 кг;
• 5-6-синфлар — 2,5 кг;
• 7-8-синфлар — 3,5 кг;
• 9-11-синфлар — 4 кг.