Tesla компанияси SpaceX билан ҳамкорликда яратилган ракета услубидаги тезлаткичлар билан жиҳозланган янгиланган Roadster электромобилини намойиш этди. Автомобилни ишлаб чиқариш 2028 йилдан бошланиши режалаштирилган.

Оқ рангдаги, икки ўриндиқли автомобил махсус тортиш тизими ёрдамида қатор ноодатий ҳаракатларни амалга ошира олади. Хусусан, тақдимот пайтида у махсус қия йўлакда тескари ҳолатда ҳаракатланган, ҳавода айланиб, тезлаткичлар ёрдамида ерга қўнган. Тадбирнинг кейинги қисмида автомобил юк машинаси ва бошқа транспорт воситалари устидан сакраб ўтган.

Tesla компаниясининг автомобиллар муҳандислиги бўйича раҳбари Ларс Моравининг айтишича, Roadster электромобили соатига 97 километр тезликка бир сониядан камроқ вақт ичида эриша олади. Унинг максимал тезлиги эса соатига 370 километрдан ошади.

Roadster бир марта қувватланганда 480 километрдан ортиқ масофани босиб ўта олади. Бироқ бу Маск 2017 йилда, иккинчи авлод Roadster прототипи илк бор намойиш этилганида ва автомобил етказиб бериш 2020 йилда бошланиши айтилганида ваъда қилган масофанинг ярмидан ҳам кам.

Автомобилни қанчага сотиб олиш мумкин?

Тадбирда Маск ва компаниянинг бошқа раҳбарлари автомобилнинг аниқ сотув нархини маълум қилмади. Tesla қарийб ўн йил аввал Roadster’нинг бошланғич нархини 200 минг доллар деб эълон қилган эди.

Тақдимотдан кейин Tesla’нинг Roadster учун буюртма саҳифасида автомобилнинг бир нечта версияси кўрсатилди. «Performance» версиясини банд қилиш учун 50 минг доллар, «Thrust» версияси учун эса 250 минг доллар депозит талаб этилади. «Thrust» модели тезлаткичлар билан жиҳозланган.

Tesla фақат таклиф асосида тақдим этилишини билдирган «Rocket» версияси эса тўлиқ парвоз тизимига эга, бир ўриндиқли модел сифатида тавсифланган.

Автомобил технооламда янгилик бўлганига қарамай, Tesla инвесторлари у ҳақда турлича фикрда

Компания инвесторларидан бири бўлган Deepwater Asset Management компаниясининг бошқарувчи ҳамкори Жин Мэнстер X ижтимоий тармоғида тақдимотни изоҳлар экан, шундай ёзди:

«Бу анъанавий автомобил ишлаб чиқарувчиларни ноқулай аҳволга солишдан бошқа тижорий қийматга эга бўлмаган, муҳандислик имкониятларини намойиш этувчи чиқиш бўлди».

Яна бир инвестор Савер Мэрритт эса бошқача фикрда:

«Бу мен кўрган энг ақл бовар қилмас маҳсулот тақдимоти бўлди. Мен буни ўз кўзим билан кўрдим, аммо ҳамон бу қандай қилиб сунъий интеллект ёрдамида яратилмаганига ҳайронман», — деб ёзган у X тармоғида.