Бухорода «102» хизмати операторларини ҳақорат қилганлик ва пора талаб қилишда айбланган шахсга нисбатан суд ҳукми чиқди. Бу ҳақда «Xabar.uz»га маълум қилган Жиноят ишлари бўйича Қоракўл тумани суди раисининг сўзига кўра, айбдорга нисбатан 2 йил муддатга озодликни чеклаш жазоси қўлланилган.

Ҳолатга кўра, Бухоро туманилик Қ.О. ўзига аввалдан таниш бўлган Бухоро шаҳрилик фуқаро И.М. билан телефон орқали боғланиб, унинг хонадонида мавжуд бўлган 2 дона чўян иситиш батареяларини сотиб олишга келишган. Бироқ, Қ.О. унинг хонадонига борган вақтда уйда ҳеч ким бўлмаган. Яна шунча олис манзилга қайтиб келишни истамай, чўян иситиш батареяларининг пулини эгасига кейин етказиш фикри билан уларни олиб, ўз яшаш манзилига бориш учун йўлга тушган. Уйига эндигина етиб келган пайтда Қ.О.ни профилактика инспекторлари тўхтатишган. Улардан бири ўзини Бухоро шаҳар Шергирон маҳалласи профилактика инспектори, деб таништирган, фуқаролик кийимида бўлган иккинчиси эса ЖҚБ ходими эканини айтган. Қ.О. инспекторларнинг сўровига чўян иситиш батареяларининг пулини кейин етказиш фикри билан яна оввора бўлмаслик учун уни эгасидан сўроқсиз олиб келганини, у билан фақат телефон орқали боғланганини тушунтирган. Шу пайт Қ.О. ўз ҳовлисидан чиқиб келган ўғли Ж.А.га ҳам вазиятни айтиб берган. Бироқ, Ж.А. жазавага тушиб, ички ишлар органлари ходимларини гўёки отасини ўғриликка айблаётган, дея ўйлаб, уларни ҳақорат қилиб ташлаган.

Сергаклик ва огоҳлик юзасидан ўз хизмат вазифасини бажараётганини тушунтираётган орган ходимларига қулоқ солмай, ўша жойнинг ўзида “102” қисқа рақамига қўнғироқ қилган. Ички ишлар органлари ходимларини жиноят қилаётганликда айблаган. Ҳатто, «102» кичик мутахассисини ҳам куракда турмайдиган сўзлар билан сўккан. Уларнинг шаъни ва қадр-қимматини оёғости қилган.

Ж.А. судда ёлғон кўрсатма бериб, ички ишлар органлари ходимлари унинг оиласига босим ўтказиб, пул талаб қилиб, ўзига нисбатан таҳдидлар бўлганини билдирган. Олиб борилган тезкор-тегов суриштирув ишлари ҳамда суд тергови ҳаракатлари давомида Ж.А. бирор-бир сўзини исботлай олмаган. Икки нафар ички ишлар органлари хизмат ходимлари бўлган жабрланувчилар эса айбдорнинг ҳақоратли аудиоёзувларини ҳамда видеокузатув камералари орқали ўзларининг ҳеч қандай босим ўтказишмагани, ҳақорат қилишмагани, ўз хизмат вазифаларини олиб боришганини фактлар билан судга тақдим этишган.

Етмаганига айбдор инспектордан унинг асабларини қўзитгани учун пул талаб қилиш орқали уни айблаб, туҳмат қилиш жиноятини ҳам содир этган.

«Суд жараёнида Ж.А. айбини тан олди, қилган ишларидан пушаймонлигини билдирди ва оилавий шароитига эътибор қаратилишини сўради»,-дейди суд раиси Бобораҳим Очилов.

Ижтимоий тармоқларда кенг муҳокамаларга сабаб бўлган ушбу воқеа давомида ИИБ ходимлари ҳам Ж.А.нинг оиласидаги оғир шароит ва унинг ўз айбини тан олганини инобатга олган ҳолда инсонийлик тамойилларини устун қўйиб, суддан енгил жазо тайинланишини сўрашган.

Суд тергови давомида, жабрланувчилар ва гувоҳлар кўрсатмалари, аудио ёзувлар, суд-лингвистика экспертизаси натижалари асосида Ж.А. Ўзбекистон Республикаси Жиноят кодекси 139-моддаси (қасддан шаънини ва қадр-қимматини ҳақорат қилиш) ҳамда 140-моддаси (туҳмат) 3-қисмлари билан айбли, деб топилган.