2020 йил 1 майдан бошлаб барча ишловчи пенсионерларга пенсиялар тўлови тўғридан-тўғри бюджетдан ташқари Пенсия жамғармаси орқали амалга оширилмоқда. Ушбу пенсия тўловларининг янги механизми қандай? Энди пенсионерлар қачон пулни олишлари мумкин? Апрель ойи учун тўлаб берилган пенсиялар корхоналарга компенсация қилинадими?

Ушбу саволларга Песия жамғармаси ва «Халқ банки»нинг матбуот хизмати мутахассисларининг жавоби шундай:

Мамлакатимиздаги эпидемиологик вазият ва пенсияларни ўз вақтида олиш заруратини инобатга олган ҳолда, ишловчи пенсионерларни ҳимоя қилиш мақсадида Президентнинг 2020 йил 27 апрелдаги ПФ-5986-сон Фармони қабул қилинган. Ушбу ҳужжат ижроси юзасидан барча ишловчи пенсионерларга “Халқ банки”нинг махсус овердрафт пластик карталари очилади. Ва карантин тадбирлари даврида пенсиялар уларга бюджетдан ташқари Пенсия жамғармаси маблағларидан тўлаб берилади.

Шу билан бирга – карантин вақтида ишловчи пенсионерларга пластик карталар уйга етказиб берилади.

Ташкилотлар пенсия суммаларини қоплаш учун талабномаларни расмийлаштиришлари зарур эмас. Ўтган давр, яъни – апрель ойи, шунингдек май ойи учун тўловлар «Халқ банки» томонидан бюджетдан ташқари Пенсия жамғармасидан олинган маълумотлар асосида пластик карталарга келиб тушади.

Бунда ташкилот ўз маблағлари ҳисобидан апрель ойи учун пенсия тўлаган ишловчи пенсионерлар ҳам шу давр учун тўловларни оладилар.

Изоҳ: Мазкур вазиятда ўзининг ишловчи пенсионерларига апрель ойи учун пенсияларни тўлаб берган ташкилот ушбу маблағлар қоплаб берилиши учун апрель ойи учун тўланган пенсия суммаларини келиб тушган ортиқча тўловларни инобатга олган ҳолда бевосита ўз ходимларидан талаб қилишлари керак бўлади.