Украина президенти Владимир Зеленский Вашингтонга сафари чоғи АҚШ собиқ давлат котиби Ҳенри Киссинжер билан ҳам музокара ўтказди.

Украина президенти девони раҳбари Андрей Ермак учрашув мазмундор ўтганини билдирган. 

«Суҳбат чиндан ҳам жуда чуқур ва мазмундор кечди. Киссинжер Россиядаги ҳозирги ҳолатни ифодаловчи кўплаб аниқ таърифлар келтирди», – деб ёзган А.Ермак.

Девон раҳбари АҚШ дипломатияси оқсоқоли аввал Украинанинг НАТОга киришига қарши бўлгани, энди эса позициясини ўзгартирганини қайд этган.

«Ушбу зиддиятга қадар (Россия босқини назарда тутилмоқда – таҳр.) Украинанинг НАТОга аъзо бўлишига қарши эдим. Негаки, аъзолик биз ҳозир гувоҳ бўлиб турган жараёнга (уруш назарда тутилмоқда – таҳр.) олиб келишидан хавотирланган эдим. Ҳолат шу даражага етган экан, бетараф Украина ғояси ўз аҳамиятини йўқотди», – деган Ҳ.Киссинжер.

Жорий йил 27 май куни 100 ёшга тўлган Киссинжер 1973–1977 йилларда АҚШ давлат котиби лавозимида фаолият юритган, Вьетнамдаги урушни тўхтатишга қўшган ҳиссаси учун 1973 йилда Нобель мукофоти билан тақдирланган.

Узоқ йиллар Украинанинг Шимолий альянсга киришига мухолиф бўлган сиёсатчи Киев Кремль таъсир доирасида қолишини ёқлаган. Қримнинг Россия томонидан босиб олинишини ҳам оқлаб, Москвага нисбатан жорий этилган санкцияларни танқид қилган.

2022 йил май ойида Давосдаги Бутунжаҳон иқтисодий форумида Киссинжер Киев урушни якунлаш учун Россияга ҳудудлар борасида ён бериши кераклигини айтган. Мазкур баёнот Ғарб жамоатчилигининг кескин эътирозига сабаб бўлган.

Кейинги вақтларда Украина борасида оғир-вазмин позицияга ўтаётган Киссинжер ниҳоят мамлакат НАТОга кириши лозим деган хулосага келган.

Аввал хабар берганимиздек, оқсоқол дипломат Россия ва Хитойнинг қилўтмас дўст бўлиши Ғарб манфаатларига зид эканини очиқ эътироф этиб, бу масалада оқилона сиёсий ёндашув ишлаб чиқишни тавсия этган эди.