Норвегиялик шахматчи Магнус Карлсен ўтган йилнинг декабрида бўлиб ўтган шахматнинг рапид йўналиши бўйича жаҳон чемпионатида можарога сабаб бўлган жинси шимни 36 100 долларга сотиб юборди.

Бу ҳақда унинг ўзи ижтимоий тармоқдаги саҳифасида маълум қилган.

Жинси шим eBay онлайн аукцион сайтида сотувга қўйилган ва унга жами 94 та харидор таклифи келиб тушган. Хабарда айтилишича, савдодан тушган маблағ Big Brothers Big Sisters хайрия жамғармасига йўналтирилади.

Эслатиб ўтамиз, 28 декабр куни Карлсен кийиниш қоидаларини бузгани учун Нью-Йоркда бўлиб ўтган жаҳон чемпионатидан дисквалификация қилинган ва 200 доллар жаримага тортилган эди. Норвегиялик шахматчи турнирга жинси шимда келган ва кийимини алмаштиришдан бош тортган. Карлсеннинг айтишича, у эртаси куни кийим алмаштиришни режа қилган, бироқ ташкилотчилар уни имкон қадар тезроқ алмаштиришни талаб қилишган ва бу унинг учун принципиал масалага айланган.

Кейинроқ FIDE қоидаларига ўзгартириш киритиб, блиц-турнирда жинси шимларда иштирок этишга рухсат берганини эълон қилди.