Волфганг Амадей Моцарт (1756–1791)нинг юз тузилиши қандай бўлган? Узоқ йиллик бу жумбоққа жавоб излаган олимлар буюк бастакорнинг ташқи кўринишини тиклашди, деб хабар берди Daily Mail.

Моцартнинг аксарият сақланиб қолган портретлари унинг вафотидан сўнг йиллар ўтиб қилинган ижод маҳсули, унинг ҳаётлиги чоғида чизилганлари эса бир-биридан кескин фарқ қилади.

Юз тузилишини тиклаш бўйича суд-тиббиёт эксперти Цицерон Мораеснинг айтишича, бошқа бир лойиҳа устида ишлаётганида Моцартники эканлиги айтилган бош чаноғи тасодифан унинг қўлига тушиб қолади. Тарихий шахсларнинг юз тузилиши устида 10 йилдан кўпроқ вақтдан буён шуғулланиб келаётган Мораес ва унинг жамоаси фурсатни бой бермай ишга киришади.

«Бош чаноғи, пастки жағ ва айрим тишларнинг йўқлигини айтмаганда, яхши сақланган эди. Етишмаган қисмларни статистик маълумотлар ва анатомик мувофиқлик бўйича тикладик», — деди Мораес.

Тадқиқотчилар ишни бош чаноғини виртуал тиклашдан бошлаган, кейин юзни тўлиқ тиклаш учун турли техникалар қўлланилди. Юмшоқ тўқималар қалинлиги маркерлари ва юзлаб катта ёшли европаликларнинг ўлчамлари асосида юзнинг бурун, лаб, қулоқ ва бошқа қисмларига аниқлик киритилди.

«Қолаверса, анатомик деформация техникасини қўллаб, виртуал донор бошини Моцарт бош чаноғига мосладик. Бу мос келувчи юз қиёфасини яратиш имконини берди», — қўшимча қилди мутахассис.