«Usmоn Brothers» корхонаси жойлашган ерлар икки йил олдин ҳам дала-дашт эди. 2017 йили бу ерда «Юксалиш» кичик саноат зонаси қурилиши қарори қабул қилинди.

Бу ерларда саноат ҳудуди очиб, Наманган аҳлини иш билан таъминлаш қарори чиқарилгандан сўнг ҳудуд кўриниши ҳам кескин ўзгариб кетди.

— Саноат зонасида иш бошлагунга қадар «Usmоn Brothers» корхонаси анча кичик эди, ички бозор учун маҳсулот ишлаб чиқариларди. Икки йил олдин корхонамиз учун ҳаммаси ўзгариб кетди. Бизга катта кредит ажратилди ва қатор имтиёзлар берилди. Шундан сўнг мана шу корхонани қурдик, — дейди иш бошқарувчи Темур Ҳошимов.

Тадбиркорнинг айтишича, ҳозирда Италия ва Япониядан қимматбаҳо ускуналар келтирилган ва «Usmоn Brothers»нинг нигоҳи Европа бозорига қаратилган. Аммо бу иш осон кечармикан? Ҳар ҳолда Европа бозорига киришни истаган корхона энг аввало тегишли сифат сертификатларига эга бўлиши лозим.

—Бу масалада иш олиб борилмоқда. Биз ишлаб чиқарадиган маҳсулот етарлича сифатли ва рақобатбардош бўлади. Шу боис Европага чиқишимизга ишончимиз комил.

Бизнинг асосий кучимиз — корхонамиз мутахассисларидир. Бизда яхши модельерлар, дизайнерлар, тикувчилар ва бошқа мутахассислар бор. Ҳар ҳолда ушбу бизнесда ўн йиллик тажрибага эгамиз. Анча-мунча хорижий ҳамкорларга эгамиз. Шундай экан, Европа бозорига чиқа олишимизга ишончимиз комил.

Аввал ўзимиз чиқамиз, сўнгра Ўзбекистондаги бошқа кичик корхоналарни ишлаб чиқаришга жалб қиламиз, — дейди Темур Ҳошимов.

Шу билан бирга «Usmоn Brothers»га тегишли «бутик»лар Тошкент, Фарғона, Андижон ва Наманганда очилиши режалаштирилган.