Исроил Бош вазири Бенямин Нетаняху мамлакат Ғазо секторидаги уруш туфайли иқтисодий изоляция даврига кираётганини айтди.

Хусусан, унинг фикрича, Хитой ва Қатар Исроилнинг “қонунийлигига ҳужум қилишга” тайёрланмоқда. 

"Бир неча давлатлар ташкил қилаётган қамалдан чиқиш учун бир қанча ишларни қилишимиз керак бўлади. Улардан бири Хитой, иккинчиси Қатар. Улар Ғарб дунёси ижтимоий тармоқларида Исроилнинг қонунийлигига қарши ҳужум уюштирмоқда", - деди Бенямин Нетаняху АҚШ Давлат котиби Марко Рубио билан бўлиб ўтган матбуот анжуманида (видеоёзув Исроил ҳукуматининг Youtube каналида эълон қилинган). 

Бош вазирнинг қўшимча қилишича, дунё блокларга бўлинган ва Исроил уларнинг ҳеч бирига кирмайди. Шу билан бирга, унинг сўзларига кўра, мамлакат ўз салоҳиятига таяниб, Америка қўллаб-қувватлашидан баҳраманд бўлиб, изоляциядан чиқишга қодир. 

9 сентябр куни Исроил Қатар пойтахтига зарба берди. Мақсад Фаластиннинг ҲАМАС ҳаракатининг бош қароргоҳи экани айтилди. Бунга жавобан Қатар Исроил ва ҲАМАС ўртасидаги музокараларни ташкил қилиш учун барча воситачилик ҳаракатларини тўхтатди.