АҚШ Давлат департаменти янги сиёсат жорий этди — унга кўра, америкалик дипломатлар энди бошқа давлатларда ўтаётган сайловлар ҳақида фикр билдириш ёки изоҳ беришдан тийилишлари лозим. Бу ҳақда Reuters агентлиги 2025 йил 17 июлда хабар берди.

Мазкур кўрсатмада таъкидланишича, АҚШ дипломатлари сайловлар бўйича баёнот ёки ижтимоий тармоқлардаги изоҳларни фақатгина улар АҚШнинг ташқи сиёсий манфаатлари билан “аниқ ва тўлиқ ишончли тарзда боғлиқ бўлган” ҳолдагина беришлари мумкин.

Қўлланмада айтилишича, агар изоҳ бериш зарур бўлса, у қисқа, холис ва асосан ғолиб номзодни табриклашга қаратилган бўлиши керак. Шу билан бирга, сайлов жараёнининг қонунийлиги, адолатлилиги ёки демократик қадриятлар ҳақидаги баҳолардан воз кечиш тавсия этилган.

Шунингдек, сайловлар тўғрисидаги расмий баёнотлар фақатгина Давлат котиби ёки Давлат департаментининг матбуот котиби томонидан берилиши кераклиги белгилаб қўйилган.

Бу сиёсат АҚШ ташқи ишлар органлари томонидан сайлов жараёнларини баҳолашда эҳтиёткорликни кучайтиришга қаратилган. Reuters хабарида таъкидланишича, бу ҳаракат АҚШ ташқи сиёсатида бетарафликни таъминлаш ва дипломатик муносабатларни мустаҳкамлашга қаратилган бўлиши мумкин.

Маълумот учун, 2024 йил март ойида АҚШ элчихонаси Россияда ўтган президентлик сайловлари ҳақида танқидий баёнот берган эди. Унда сайлов "мустақил овозлар кенг кўламда бостирилган, мухолифат аъзолари қамалган, ўлдирилган ёки мамлакатдан чиқарилган" ҳолатда ўтгани айтиб ўтилган эди.