Бош прокуратура 2019-2021 йилларда Ўзбекистон спортига ажратилган бюджет маблағларининг мақсадли сарфланиши ўрганилганини ва ўрганиш жараёнида кўплаб талон-торожликлар аниқланганини маълум қилди.

Қайд этилишича, 3 йил давомида 464 та спорт муассасаларида жами 27 млрд. сўм зарар аниқланиб, унинг 10 млрд. сўми ундирилган.

Соҳа ривожи учун ажратиб келинган бюджет маблағлари турли йўллар билан талон-торож қилинган.

Жумладан, ҳудудий спорт муассасалари томонидан 20 та ҳолатда 8 млрд. сўмлик маблағлар иш ҳақи ва бошқа тўловлар сифатида ўзлаштириб олинган.

Мисол учун, Фарғона олимпия захиралари коллежи бош ҳисобчиси жами 4,3 млрд. сўм маблағни ўзига иш ҳақи сифатида олиб, талон-торож қилган.

Спорт муассасаларини қуриш-таъмирлаш ишларида эса 25 та ҳолатда 10 млрд. сўм бюджет   маблағлари ўзлаштирилган.

Шунингдек, спорт-таълим муассасаларини жорий таъмирлаш учун ўтказилган танловларда 72 та коррупциявий ҳолатларга йўл қўйилган.

Масалан, Бухоро олимпия захиралари коллежини жорий таъмирлаш учун танловда таъсисчиси Б.Қ. бўлган 4 та корхона қатнашиб, уларнинг биттаси ғолиб деб топилган.

Спорт жиҳозлари 8 та ҳолатда 4,2 млрд. сўмга қиммат нархларда сотиб олиниб, маблағлари талон-торож қилинган.

Ўтказилмаган ўқув машғулот йиғинлари ўтказилганлиги ҳақида 10 та ҳолатда ҳужжатлар сохталаштирилиб, 4,3 млрд. сўм маблағ ўзлаштирилган.

Бош прокуратура берган маълумотга кўра, қонун бузилиши ҳолатлари юзасидан 1 150 та прокурор назорати ҳужжатлари қўлланилиб, 431 нафар шахснинг бузилган ҳуқуқи тикланди ҳамда 66 та жиноят иши қўзғатилди.