Ўзбекистон Европа ва АҚШ бозорига тайёр кийим-кечак маҳсулотлари экспортини кенгайтириш, тармоқда стандартлаштириш ва рақамлаштириш ишларини кучайтиришга киришди.

Техник тартибга солиш агентлигига халқаро сертификатга эга корхоналар сонини 300 тага етказиш вазифаси қўйилди. Шу билан бирга, Ташқи ишлар вазирлигига айланмаси 1 миллиард доллардан юқори бўлган йирик халқаро брендлар билан ҳамкорлик бўйича “йўл харитаси”ни ишлаб чиқиш ҳамда сентябрда Тошкентда ўтказиладиган йирик кўргазмага ушбу компанияларни жалб этиш топширилди.

Маълумотларга кўра, АҚШнинг йиллик текстиль бозори ҳажми тахминан 100 миллиард долларни ташкил этади. Мутасаддилар фикрича, қўллаб-қувватлаш чоралари орқали бу мамлакатга экспорт ҳажмини 5–6 баробарга ошириш мумкин. Шу мақсадда Сент-Луис ва Нью-Йорк шаҳарларида икки савдо уйини очиш режалаштирилган.

Шунингдек, тўқимачилик корхоналарида сунъий интеллект технологияларини жорий этиш орқали даромадни 20–30 фоизга ошириш, фаолиятни шаффофлаштириш ва яширин иқтисодиёт улушини камайтириш кўзда тутилмоқда. Бу йўналишда ERP тизимини жорий этиш бўйича дастур ишлаб чиқилади, корхоналарни ушбу тизимга ўргатиш харажатларининг бир қисми давлат томонидан қоплаб берилади.