Хоразмда “Халқ билан бирга” умуммиллий дастури доирасида “Ишбилармон аёл” танловининг ҳудудий республика босқичи ўтказилди. Ўзбекистон Либерал-демократик партияси ташаббуси билан ташкил этилган танловда вилоятнинг 500 дан ортиқ маҳалласи ва тадбиркорлик субъекти қамраб олинди.

Саралаш босқичларида 3054 нафардан зиёд тадбиркор хотин-қиз иштирок этди. Улар орасидан 13 нафар энг истиқболли ишбилармон аёл вилоят босқичида ўз бизнес лойиҳалари ва фаолиятини намойиш қилди.

Танловнинг ўзига хос жиҳати – тадбиркорларни фақат йирик шаҳарлардан эмас, маҳаллалардан излашга урғу берилгани. Янги иш ўринлари яратаётган, маҳаллий маҳсулот ишлаб чиқараётган, экспорт қилаётган ёки қишлоқ хўжалигида янги ёндашувларни қўллаётган аёллар саралаш жараёнида аниқланди.

Вилоят босқичида Хива шаҳридаги “Khiva Plaza” МЧЖ раҳбари Лола Мирзаева биринчи ўринни эгаллади. Корхонада 150 нафар ходим ишлайди. Иккинчи ўрин “Шовот-Қумтепа” фермер хўжалиги раҳбари Ойчеҳра Тоҳировага насиб этди. Хўжаликда шифобахш гиёҳлар етиштирилмоқда.

Учинчи ўринни “Маржона текстил” МЧЖ раҳбари Дилафрўз Бекжанова олди. Корхонада 70 нафар хотин-қиз доимий иш билан таъминланган. 2025 йилда корхона Россияга 200 минг долларлик болалар кийимлари экспорт қилган.

Ташкилотчиларнинг таъкидлашича, танловдан мақсад – маҳаллаларда ўз ишини йўлга қўйган хотин-қизларни аниқлаш, уларнинг тажрибасини оммалаштириш ва тадбиркорлик ташаббусларини қўллаб-қувватлаш.

Хоразмдаги 3054 нафар иштирокчи эса маҳаллаларда тадбиркорлик салоҳияти қанчалик кенг эканини кўрсатмоқда.