Перу президентлигига Libertad Popular («Халқ эркинлиги») либерал-ўнг партиясидан номзоди кўрсатилган Рафаэл Белаундега суиқасд уюштирилди. Бу ҳақда Перунинг Exitosa нашри хабар берди.

Дастлабки маълумотларга кўра, сиёсатчи пойтахт Лимадан жанубда машинасида ўтирган пайтида ёлланма қотиллар унга ўқ узган. Ҳайдовчи ўрнига қарата тўғридан-тўғри уч марта ўқ узилганига қарамай, сиёсатчи енгил жароҳат олган.

Собиқ конгрессмен Жино Коста сиёсий сайловолди пойгаси авжига чиққан пайтда айни воқеа юз берганидан таассуфда эканини билдирди. У мамлакат полицияси ва бошқа расмийларни ушбу ҳужум иштирокчиларини зудлик билан қўлга олишга чақириб, ҳукуматдан яқин ойлар ва ҳафталарда президентликка номзодларга зарур хавфсизлик кафолатларини тақдим этишни талаб қилди.

Белаунде полиция маҳкамасига келиб, илк баёнотини берди. Маълум қилинишича, суиқасд уюштирилган пайтда у сайлов билан боғлиқ сиёсий фаолиятни бажармаган, балки шахсий ишлари билан шуғулланаётган бўлган.