АҚШ, Россия ва Хитой етакчилари — Доналд Трамп, Владимир Путин ва Си Цзинпин сентябр ойи бошида Пекинда қўшма учрашув ўтказиши мумкин. Бу ҳақда Хитойдаги манбаларга таяниб, The Times газетаси хабар берди. 

Газетанинг ёзишича, учрашув Иккинчи жаҳон уруши тугаганининг 80 йиллигини нишонлашга тўғри келиши мумкин. 3 сентябр куни Тянанмен майдонида тантанали ҳарбий парад ўтказилиши режалаштирилган, унда Хитой ва Россия раҳбарлари иштирок этиши кутилмоқда. 

 “Хитой, Россия ва Америка етакчиларининг бирга турган қиёфаси тинчлик ва барқарорликнинг муҳим хабари бўлиши мумкин”, — дея хитойлик сиёсатшунос Жин Канронг сўзларини келтиради газета. 

Владимир Путин аллақачон тадбирларда иштирок этишини тасдиқлаган. Унинг Си Цзинпин билан музокаралари 2 сентябрга белгиланган, деди президент ёрдамчиси Юрий Ушаков. Пекин бу тадбирларга Доналд Трампни ҳам таклиф этиш имкониятини кўриб чиқмоқда. The Times таъкидлаганидек, уч томонлама музокаралар ўтказиш имконияти мавжуд, аммо Трамп уларни АҚШ ҳудудида ўтказишни афзал кўради.