Россия Украина шаҳарларини бомбардимон қилишни бас қилмаётган экан, унга қарши санкцияларни янада кучайтириш керак. Душанба куни Люксембургда учрашган Европа Иттифоқи ташқи ишлар вазирлари ана шундай хулосага келишди. 

ЕИ вазирлари фикрича, Кремль ўт очишни тўхтатиш ва тинчлик ўрнатишни истамаётир. Россия томонидан Украинанинг Суми шаҳрига ракета ҳужуми уюштирилгани ҳам шундан далолат беради.

13 апрел куни Россия армияси Суми шаҳрига иккита баллистик ракета отди. Тинч аҳолига қаратилган ҳужум оқибатида камида 34 киши, жумладан, икки нафар бола ҳалок бўлди, 117 киши жароҳатланди.

ЕИ ташқи ишлар вазирлари АҚШ президенти Украинада тинчлик ўрнатишга уринаётган бир пайтда ракета ҳужумлари тўхтамаётганини “Путин Трампнинг устидан кулмоқда” дея талқин этишган.

“Россиянинг Украинага сўнгги ҳужумларидан даҳшатга тушдим. Умид қиламанки, президент Трамп ва АҚШ маъмурияти Россия лидери (тинчлик ўрнатишга қаратилган) эзгу ният устидан кулаётганини англаб етишади ва тўғри қарорлар қабул қилишади”, – деган Польша ташқи ишлар вазири Радослав Сикорский.

Сайловолди кураш даврида Украина урушини 24 соат ичида тўхтатишга ваъда берган Трампга Путиннинг тинчлик бўйича келишувни пайсалга солаётгани хуш келмаётир.

Таҳлилчиларга кўра, Кремл Оқ уй таклиф этаётган тинчлик битимини қабул қилмай, турли-туман шартларни илгари сураётгани сабаб Трампнинг Путиндан ҳафсаласи пир бўлмоқда. Буни Трампнинг Путинга нисбатан риторикаси ўзгариб бораётгани ҳам кўрсатмоқда.

Бир муддат олдин Путинни Украина урушининг сабабчиси ва агрессор дейишдан қочган Трамп апрель ойи бошида агар Россия Украинада тинчлик битимига рози бўлмаса, қўшимча санкциялар жорий этиш билан таҳдид қилди.

Сумига шаҳрига Россия томонидан ажал ракеталари учирилишини ҳам Трамп “даҳшатли”, “мудҳиш” ҳолат ўлароқ баҳолаган. Айни пайтда, у россиялик ҳамкасби айбини камайтириб кўрсатиш учун бўлса керак, ракета ҳужумини “хато” деб атаган.