Саудия Арабистонининг «Ан-Наср» клубида тўп сураётган ҳужумчи Криштиану Роналдуга тегишли хусусий самолёт Мадридга парвоз қилган. Бу ҳақда The Sun нашри хабар берди.

Лайнер дронларнинг Ар-Риёддаги АҚШ элчихонасига ҳужумидан кўп ўтмай Испания пойтахтига қўнган.

Самолёт йўналиши Миср ҳаво ҳудуди ва Ўрта ер денгизи орқали ўтган. Бироқ британ нашри 41 ёшли футболчининг парвоз вақтида бортда бўлган-бўлмагани ҳақида аниқ маълумотга эга эмас.

Шошилинч парвоз минтақадаги вазият кескинлашгани билан боғланмоқда. Аввалроқ АҚШ ва Исроил томонидан Эронга қарши ҳарбий операция бошлангани ҳақида хабарлар тарқалган, Теҳрон эса бунга жавобан қўшни мамлакатлардаги рақиб базаларига кенг кўламли ҳужумлар уюштиришини маълум қилган эди.

Криштиану Роналду 2022 йил декабридан буён Саудия чемпионатида тўп суриб келмоқда. У беш карра “Олтин тўп” соҳибидир. Футболчи тўққиз йил давомида "Реал Мадрид" шарафини ҳимоя қилган ва клуб афсонаси сифатида эътироф этилади, шунингдек Мадридда кўчмас мулкка ҳам эга.

Ҳозирча футболчининг ўзи ёки клуби расмийлари шахсий самолётнинг нега учиб кетгани ва португалиялик ўйинчининг қаерда экани юзасидан расмий баёнот бермаган.