Швейцария АҚШ президенти Доналд Трамп билан бож тарифларини пасайтириш бўйича муваффақиятсиз музокаралардан кейин қимматбаҳо совға-саломлар орқали мақсадига эришган. Бу ҳақда «Axios» нашри хабар берди.

Жорий йил 4 ноябрь куни Трамп Оқ уйда Швейцариянинг бизнес делегациясини қабул қилган эди. Делегация сафида «MKS PAMP SA» қимматбаҳо металлар ширкати раҳбари Марван Шакарчи, люкс тоифасидаги соатлар ишлаб чиқарувчи «Rolex» компанияси раҳбари Жан-Фредерик Дюфур ва ҳашаматли маҳсулотлар ишлаб чиқаришга ихтисослашган «Richemont» ширкати директорлар кенгаши раиси Йоханн Руперт бўлган.

Маълум бўлишича, швейцариялик тадбиркорлар Оқ уйга қуруқ қўл билан келмаган. Жумладан, «MKS PAMP SA» ширкати раҳбари Марван Шакарчи Трампга қиймати 130 минг долларлик қуйма олтин совға қилган. «Rolex» етакчиси Жан-Фредерик Дюфур эса АҚШ раҳбарини тилладан ясалган стол соати билан сийлаган. «Axios» нашри манбаларига кўра, «Rolex» раҳбари аввалига Трампга нодир титан соат совға қилмоқчи бўлган, аммо АҚШ раҳбари тиллани хуш кўришини ўйлаб қарорини ўзгартирган.

Тадбиркорлар билан учрашувдан ўн кун ўтиб, АҚШ ҳукумати Швейцария маҳсулотларига бож миқдори 39 фоиздан 15 фоизга туширилганини эълон қилган. Расмий Берн АҚШга сармояни ошириш ва савдо тўсиқларини бартараф этишга ҳам ваъда берган.

АҚШ Швейцарияга бож миқдорини ошириши ҳақида апрель ойида баёнот берилгани ортидан мазкур мамлакат президенти Карин Келлер-Зуттер ҳамкасби Трамп билан музокара ўтказган, аммо уни ниятидан қайтара олмаган эди.

АҚШ Конституцияси ҳукумат аъзоларига хорижий давлатлардан Конгресс рухсатисиз совға олишни ман этади. Ушбу тақиққа тушмаслик учун Оқ уй Швейцария тадбиркорлари келтирган қимматбаҳо туҳфаларни Президент кутубхонасига совға сифатида расмийлаштиргани айтилмоқда.

Доналд Трамп олдин ҳам хорижий давлат вакилларидан қимматбаҳо совғалар олгани маълум.

Аввал хабар берганимиздек, жорий йил май ойида Қатар давлати Трампга 400 млн долларлик «учар қаср» – Boeing 747-8 cамолётини совға қилган эди.

Трамп август ойида «Apple» ширкати хорижда ишлаб чиқараётган маҳсулотларга бож жорий этишини айтгач, компания бош директори Тим Кук сиёсий етакчига 24 карат олтинни ўз ичига олган сувенир туҳфа қилган. Ширкат АҚШда ишлаб чиқаришни кенгайтириш учун 100 миллиард доллар сармоя киритишга ҳам ваъда берган.

Октябрь ойида эса Жанубий Корея президенти Ли Чжэ Мён Трампга олтин тож пешкаш қилди. Бунинг ортидан ушбу давлат маҳсулотларига бож миқдори камайтирилиши эълон қилинди.