Мисрнинг Синай яриморолида жума кунидан буён олиб борилган ҳарбий амалиёт натижасида 16 нафар террорчи йўқ қилинди ҳамда 34 нафари қўлга олинди. Бу ҳақда 11 февраль куни Миср армияси маълум қилди, дея хабар бермоқда «Le Monde» нашри.

«Синай 2018» деб номланган ушбу операцияга денгиз ва ҳаво кучлари жалб этилган бўлиб, улар Синай яримороли ва унинг атрофини қамраб олган. Бу ҳудудда ИШИД гуруҳи томонидан террорчилик ҳаракатлари мунтазам равишда амалга оширилиб турилади.

Армия матбуот котибининг хабарида айтилишича, 66 та террорчилар «уяси», 11 та автомобиль ва 31 та мотоцикл йўқ қилинган. Террорчиларга тегишли бўлган портловчи моддалар тайёрлайдиган лабораториялар, алоқа воситалари сақланаётган «ахборот марказлари» аниқланиб йўқ қилинган.

Ўтган йилнинг 24 ноябрь куни Синайдаги масжидга қилинган ҳужум натижасида 300 киши нобуд бўлганди. Ушбу воқеадан кейин Миср президенти Абдулфаттоҳ ас-Сиси бош-штаб бошлиғига ва ички ишлар вазирига Синайдаги барқарорликни таъминлаш учун уч ой муҳлат берган эди. Ушбу операция Мисрдаги президентлик сайловларига бир ярим ой муддат қолганда ҳам давом этмоқда.