19–20 апрель кунлари Экология, атроф-муҳитни муҳофаза қилиш ва иқлим ўзгариши вазирлиги назорат инспекцияси ҳамда Сирдарё вилояти давлат экологик инспекторлари ҳамкорлигида Сирдарё дарёсининг турли нуқталарда ноқонуний балиқ овлаш ҳолатларига қарши махсус назорат тадбирлари ўтказилди.                                                                                                                                            
Ушбу рейдлар аҳоли мурожаатлари асосида ташкил этилди. Айниқса, балиқларнинг уруғланиш мавсумида браконьерлар томонидан электр қармоқ ва ноқонуний тўрлар (лескали тўрлар)дан фойдаланиш ҳолатларини бартараф этиш мақсад қилинган.Тадбир натижасида дарёдан умумий узунлиги 1000 метрга яқин бўлган, ноқонуний ўрнатилган 20 га яқин лескали тўрлар аниқланиб, йиғиб олинди. Улар белгиланган тартибда йўқ қилинади. 2 нафар ҳуқуқбузар электр қармоқ ёрдамида балиқ овлаётган пайтда ушланди.                                                                                                                   
Шунингдек, ашёвий далил сифатида 1 дона алюминий қайиқ, мотор, 2 дона аккумулятор, электр қармоқ, турли ов воситалари ва 21 дона турли хилдаги балиқ мусодара қилинди. Табиатга етказилган зарар миқдори эса 368 миллион 437 минг 500 сўмни ташкил этган.                                                                                                                                                                                                                  Барча ҳуқуқбузарлик ҳолатлари бўйича ҳужжатлар ҳуқуқни муҳофаза қилувчи органларга юборилди.
Экология вазирлиги фуқароларни табиий ресурсларни асрашда фаол иштирок этишга, ҳамда фақат белгиланган қоидалар асосида балиқ овлашга чақирмоқда.